Dipukul Hantu

Dipukul Hantu

wayah lagi anum palui sampai bujangan palui wan kakawalannya badiam sa kampung tapi imbah babinian masing-masing ada nang pindah ka kampung lain atawa ada jua nang bacari ka kuta.
karna kampungnya jauh matan kuta maka hanya saminggu sakali bubuhannya tulakan ka pasar.
itupun biasanya barumbungan, bararamian naik sapida mulai subuh lalu parak asyar hanyar bulikan imbah habis manuntun biskop.
"walaupun kami sarantang saruntung ka pasar tapi ada jua wayahnya kami kada taimbai karna masing-masing ada kasibukan di rumah," ujar palui bakisah wan bininya.
"wani hajalah sampiyan saurangan ka pasar padahal jauhnya bapuluh pal matan wadah kita ini?" sahut bini palui.
"kalu jadi lalakian pantang pamburisit, kaina dipadahakan urang bancir," ujar palui.
"maksud ulun kadanya bawawanian bakalahi tapi kalu pina kapacahan ban, pagat rantai," sahut bininya kada hakun kalah.
"kada apa-apa umanya ai, karna siang hari banyak haja urang lalu lalang jadi wani haja kalu tapintang saurangan.
tapi ada pang pangalamanku wayah lagi bujangan tadi," ujar palui bakisah.
"kisah ini adalah kisah lagi anum wayah zaman japang, wayah zaman saraba sakit balum ada taksi padesaan kaya wayah ini," ujarnya.
"wayah itu aku ditinggalakan kakawalan tulak ka pasar malam di kuta.
karna kahandakan malihat karasmin maka kutulaki saurangan manyusul bubuhannya.
wayah itu malam jumahat hujan rintik-rintik aku tulak manyusul bubuhannya imbah magrib.
"naik apa sampiyan malam-malam ka kuta," ujar bini palui.
"ya kaya biasa basapida buruk itu pang sahut palui.
karna hujan rintik-rintik apalagi jalanan kadap banar maka kutinjak sapida laju-laju.
di jalanan sunyi banar kadada tatamu atawa taimbai urang lain, jadi tapaksa manguatakan hati bawani, daripada kahandakan malihat karasmin," ujar palui.
"tapi aman haja kalu di jalanan," nang bini batakun.
"itulah nang jadi kisahnya, ujar palui.
"balum sampai di simpang tiga paharatan laju maninjak sapida, mantakup aku di pukul urang.
dalam hati aku bapikir siapa nang mairingi aku lalu mamukul matan balakang.
ini kuanggap urang kada wani karna mamukul bacuntan sebab kalu mamukul matan hadapan pasti kalawan biar bamatian kusanggupi," ujar palui.
"kira-kira ada sual bibinian kalu," ujar bininya.
"nah.
.
.
.
.
.
curiga kalu sahut palui.
"aku lagi anum samasakali kada hakun tahual sual bibinian karna kuanggap manyupanakan.
imbah dipukul tadi aku tagulung katanah lalu kucari siapa urangnya nang mamukiul bacuntan tadi.
tapi imbah kucari bakuliling kadada jua tadapat siapa urangnnya, lalu aku bapikir: aku ini pasti dipukul hantu apalagi wadah aku rabah tadi parak kuburan bahari," ujar palui bakisah.
"jadi sampiyan parcayalah dipukul hantu?" ucap bininya.
"eeeee.
.
.
.
.
.
.
sakalinya imbah kulihat kabalakang, ban balakang sapidaku pagat lalu karna kalajuan langsung mahambat kabalukukku.
maklumlah wayah zaman japang itu ban sapidanya adalah ban buta, apalagi sapidaku kada baancak wan kada basalibur jadi langsung mahukumakan kaawak," ujar palui bakisah.
mangalikik bini palui tatawa mandangar kisah lakinya tentang sapida ban buta di zaman japang, maklumlah zaman susah balum mardika ujarnya.
(emhati/rep)


Source from: banjarmasin[dot]tribunews[dot]com

Tweet

Jangan sampai ketinggalan postingan-postingan terbaik dari Portal Berita Online Kalimantan. Berlangganan melalui email sekarang juga:

Atau sobat juga bisa follow Portal Berita Online Kalimantan dengan mengklik tombol di bawah ini:

Artikel keren lainnya:

Ditulis oleh laso pada tanggal Tuesday, June 25, 2013