 |
| Tahurup Amplop |
kada lawas tadi mamarina palui manikahakan anaknya.
karna kadada nang tuha lainnya maka palui tapilih jadi kapala gawi.
gasan malam baninikahan itu palui saurang nang maaturnya karana gawiannya kada banyak.
salamatan saraba sadikit manyaru tatuha kampung parak rumahnya, kurang labih ampat puluh ikung haja.
sudah diaturnya panghulu nang disaru panghulu kacamatan haji quba.
urangnya anum haja tapi tamatan pasantren di jawa.
lalu nang mambaca ayat-ayat suci alquran bubuhan tadarusan langgarnya.
ada jua sambutan tatuha dipilih bakas pambakal haji syukri.
mamarinanya bapasan imbah tuntung acara baninikahan kaina supaya palui jangan kada ingat manyadiaakan amplop.
palui mulai mahitung gasan panghulu salawi, gasan nang mambari sambutan kaya itu jua.
gasan nang mangaji karna bubuhannya dibari saparunya.
jadi sabalum acara dimulai palui sudah siap lawan amplop-amplop baisi duit itu.
imbah nang disaru sudah takumpul maka acara dimulai pangajian, lalu baninikahan ulih panghulu sampai ijab kabul.
habis ijab kabul sampai maneken surat-surat nikah, panghulu baucap :aku ini awak asa gagaringan, maka gasan nasihat parkawinan kusarahakan lawan pakacilku garbus, sidin ini tamasuk tatuha di kaluarga kami.
palui takajut kanapa maka pangulu manunjuk garbus.
padahal inya tahu banar siapa garbus itu, tapi karna sudah disambat lawan diminta panghulu maka tapaksaai dikabulakan.
nang ngaran si garbus katuju bapander maka cacarancang inya banasihat ka hulu ka hilir, banyak urang takurihing mandangarakan nasihatnya.
imbah nasihat garbus ditarusakan lawan sambutan pambakal tuha, nang isinya sadikit manyindir garbus.
kita ini bahanu harat bananasihat gasan urang lain tapi kada ingat manasihati diri kita saurang.
nasihat itu kada di muntung haja tapi harus digawi, dinampakakan lawan parbuatan kita sahari-hari.
nang kaya pangantin tu, basasayangan jangan di bibir haja tapi sampai ka hati sampai mati, ujar pambakal tuha pulang.
palui katuju banar lawan sambutan pambakal tuha.
pas mangana gasan pangantin, tapi pas jua manyindir garbus.
tapi nang dipikirakan palui di samping nasihat garbus ini dibari amplop atawa kada dibari.
apalagi amplop nang disadiaakannya cukup gasan tiga ikung haja, kada tahitung si garbus.
tapi, mamarinanya manyuruh supaya dibari haja tanda tarima kasih.
lui.
.
.
aku tarima kasih banyak, tarima kasih banar ikam mambari aku amplop, kada kukira isinya banyak banar salawi ribu rupiah, ujar garbus wayah batamuan isuknya.
palui taungut kada kawa manjawab, kada kawa baucap lagi kasupanan, rupanya inya tasalah manjulung amplop gasan garbus kabanyakan.
padahal, husus gasan garbus jumlah balain, cuma rp 5 ribu.
lalu takamana lawan siapa nang manarima paling sadikit lima ribu rupiah, ujar palui dalam hati.
(tam)
Source from: banjarmasin[dot]tribunews[dot]com
Belum ada tanggapan untuk "Tahurup Amplop"
Post a Comment
Note: Only a member of this blog may post a comment.