 |
| Bamuha Kandal |
"aku sanang banar hati bila bajalanan wan ikam," ujar garbus mamanderi tulamak.
"aku paham haja ikam ma-ambung aku bus ai, karna aku tahu bahwa ikam balum kawa mamunahi hutang.
aku kada managih bus ai," ujar tulamak.
"maksudku kada ma-ambung mak ai tapi aku mangakui bahwa bajalanan wan ikam ini kada cagar kahausan, kada cagar kalaparan karna ikam banyak akal, banyak kawan jadi di mana-mana pasti haja ada nang mambawai nginuman atawa makanan," ujar garbus.
"makanya kita harus babaik-baik wan urang, jangan cakah, janga harat, jangan pamalar," ujar tulamak.
"sabujurnya aku handak jua kaya ikam itu mak ai tapi kada kawa karna kadada baisian ciri nang kawa diagakakan," ujar garbus.
"ciri napa nang kawa kuagakakan itu bus?" ujar tulamak.
"ciri ikam nang nyaman diingatakan adalah awak ikam nang lamak itu, di mana-mana urang tahu bahwa ikam adalah si tulamak nang lamak mungkal sasak di lawang," ujar garbus manyindir sambil tatawa.
"alhamdulilah, di samping disindir nyatanya aku ada jua baisi kalabihannya," ujar tulamak.
"mungkin karna hal ini aku babida wan kawal kita si palui nang luhau itu, karna inya katuju pander mahaluya wan kada tau supan," ujar tulamak mambandingakan dirinya wan palui.
"kalu handak manyindir atawa manguya aku mak ai, baiknya bahahadapan wan tarus tarang haja jangan ibarat paribahasa 'manawak batu tangan basambunyi', artinya waninya manguya wani babalakangan," ujar palui nang hanyar datang manyahut ucapan tulamak.
"ucapan tulamak itu bujur haja lui ai.
inya mamadahakan watak wan kalakuan ikam itu wani wan tagas," ujar garbus umpat malawanakan karna malihat palui pina sarik.
"hi'ih, kawal kita palui ini dasar tahan
bamuha kandal," ujar tulamak manambahi sindirannya handak mambalas karna inya rancak dikalahakan palui.
"
bamuha kandal itu napa artinya bus?" ujar palui manakuni garbus karna inya kada paham.
"
bamuha kandal itu artinya wani wan tagas, walaupun disindir urang ikam tatap lihum wan kada sarik.
makanya biarpun ikam disindir tulamak wan dipadahakan
bamuha kandal,
bamuha kayu, kada panyupan, kada balampu ataupun disambat macam-macam tataplah bakapala dingin sarta basadia untuk mamaafkan," ujar garbus mandinginakan palui nang pina tasinggung.
"hi'ih, aku dasar wani wan tegas," ujar palui malah himung mandangar pajalasan garbus tantang
bamuha kandal itu.
"syukur inya kada paham kusambati
bamuha kandal tanda kabubungulannya," ujar tulamak marasa manang karna sakali ini kawa mangalahakan palui.
(tam)
Source from: banjarmasin[dot]tribunews[dot]com
Belum ada tanggapan untuk "Bamuha Kandal"
Post a Comment
Note: Only a member of this blog may post a comment.