Sungsung to Ongol pina telihat nahap banaran beduduk dipelataran di rumahnya sambil meingkut koran dihadapannya ada segelas kopi tumbuk khas Kampung Liur. Siapa ja nang melihatnya pasti am geleng-geleng kepala termasuk Haji Untat.
“Oi Ngol, sungsunglah sudah sarapannya koran am,” tagur sidin. “Inggih Ji, handak kemana pian sungsung neh,” sahut Ongol. “Handak kewarung Acil Jablay, handak menukar roko cap pekat,” ujar sidin. “Titip Ji lah,” sahut Ongol. “Iyakah, mana duitnya,” takon sidin. “Ne nah, angsulannya gasan pian ja Ji ai, hehehe. Merepot pian ja ulun neh,” sahut Ongol. “Kada papa ja Ngolai, kita hidup memang harus saling bantu membantu,” ujar sidin.
Handap kisah, hitungan setengah jam Haji Untat ne sudah bebulik pulang mendatangi Ongol. “Ada angsulannyalah Ji,” takon Ongol. “Ada ai, tapi diangsul wan gulaan 5 buting,” sahut Haji Untat. “Nah, pas banaran, mana gulaannya Ji,” ujar Ongol. Harau birai muha Haji Untat ne. “Busyeeet, jar tadi angsulannya diambil ja ne malahan diambil pulang gulaannya. Kacau si Ongol neh,” garunum sidin sambil meunjuk gulaan dengan hati sangkal meunjuk gasan si Ongol.
Ongol ne telihat pina nahap banaran pang membaca koran sambil beroko dikawani segelas kopi. “Membaca apa ikam Ngol,” takon Haji Untat. “Lagi lihat gambar Ji ai,” sahut Ongol. “Iyakah, gambar apa Ngol,” takon sidin pulang. “Kada tahu jua neh, gambar apakah,” sahut Ongol pina membuat Haji Untat penasaran bebanaran.
Saking penasaran lalu sidin bediri dihiga Ongol. “Ikam bisa membacalah Ngol,” takon sidin. “Hehehe, kada bisa Ji ai, Cuma bisa melihat gambarnya ja. Maklum semalam kada sekolah,” sahut Ongol pina jujuran bebanaran. “Pantas ai, gambar nang ikam lihat to tebalik,” ujar sidin.
Apada, harau masam muha Ongol pas disambati sidin tadi. “Astah, iyalah Ji, ulun kira tadi pas am posisinya pantas ai ngalih dilihat gambarnya, hehehe,” sahut Ongol. “Ikam ne pina nahap ja sungsung membaca koran sekalinya nang dilihati gambar tebalik, wakakakak,” ujar sidin sambil pamitan handak bulik kerumah melanjutkan gawian sidin menandatangi surat dikantor Kampung Liur. (fin)
Sumber : radarsampit.net
Artikel keren lainnya:
Belum ada tanggapan untuk "Baca Koran"
Post a Comment
Note: Only a member of this blog may post a comment.