Kapiting Bajarang

Kapiting Bajarang

palui hanyar bulik matan mailangi mamarinanya nang badiam di pagatan.
buliknya inya disangui bamacam-macam iwak laut.
"napa oleh-oleh matan pagatan lui?" ujar tulamak.
"kedada napanapa mak ai, tapi aku disangui urang iwak laut," ujar palui.
"aku kada mamakan iwak laut lui ai.
awakku lalu gatalan kalau tamakan iwak laut," ujar garbus.
"kalu aku cucuk wan iwak napa haja, pokoknya sabarataan rasuk tarus lui ai," ujar tulamak.
"makanya jatah garbus dibariakan ka aku haja lui ai.
""kalu ikam tu kadada kesah mak ai, kayu jabuk digulai gin ikam bantas," ujar palui lihum.
"kalu aku julung ka tulamak samunyaan kasihan si garbus.
kaya apa kalu aku suruh biniku mamasikinya, kaina kita makan baimbaian.
""akur lui ai!" ujar tulamak kasukaan.
"lalu aku kaya apa lui? adalah baisian iwak sungai lui?" ujar garbus.
"kaina ikam ku jarangakan kapiting haja bus ai," ujar palui.
"sama ai lui ai, maulah gatal-gatal jua," ujar garbus parotes.
"aku jamin bus ai ikam kada kagatalan, karna kapitingnya ini lain kapiting sambarangan," ujar palui.
"bujur lui? amun kaya itu aku hadangi nah," ujar garbus kahimungan.
"pas banar nah, kawa haja kalu aku umpat maminta kapiting bajarang? aku katuju jua lui ai," ujar tulamak umpat kahimungan.
lalu palui manyuruh nang bini manjarang kapiting gasan garbus wan tulamak.
kada lawas datang bini palui mambawa nasi, langkap paralatan makan.
"mana kapiting bajarangnya lui?" ujar garbus kada sabar.
"ini nah kapiting bajarangnya bus.
aku jamin ikam kada gatal amun makan kapiting nang sabuting ini," ujar palui sambil manyurung panci.
mahancap garbus maambil piring.
imbah mangaut ka nasi lalu inya mangaut kapitingnya.
tabuncalak garbus malihai isi panci.
"aku kada jadi umpat makan lui ai," ujar garbus malapas ka piring.
"napa bus?" ujar tulamak.
"aku digawi palui.
nyata haja kada pacangan gatal amun mamakan kapiting nangini.
amun kapiting lawang ikam jarang," ujar garbus.
"kalu kaya itu aku kada jadi umpat mamakan kapiting lawang bajarang ikam tu bus ai.
aku mamakan iwak laut haja," ujar tulamak manawaakan.
"aku mamakan iwak laut haja jua," langsung manjumput iwak pada saikungan.
"hau.
.
.
bus, kada takutan kagatalan kah?" ujar palui manggayai.
"biar haja gatal-gatal sudah.
kawa haja digaru," ujarnya kada tatahu.
(fai/rep)


Source from: banjarmasin[dot]tribunews[dot]com

Tweet

Jangan sampai ketinggalan postingan-postingan terbaik dari Portal Berita Online Kalimantan. Berlangganan melalui email sekarang juga:

Atau sobat juga bisa follow Portal Berita Online Kalimantan dengan mengklik tombol di bawah ini:

Artikel keren lainnya:

Ditulis oleh laso pada tanggal Wednesday, April 24, 2013