 |
| Bahual Potongan |
bingung tulamak handak manukar sapida mutur hanyar atawa nang bakas.
amun nang hanyar mau kada mau inya manambah duit lagi, kacuali bakaridit.
amun nang bakas cukup haja duitnya, tapi kada mamakai nang hanyar.
“napa mak ikam pikirakan jadi pina kaya urang bingung?” ujar palui manakuni tulamak.
“aku bingung lui ai, handak nukar hanyar kada cukup duit, mangaradit bingung jua,” ujar tulamak.
“mun manurut aku mak ai, mangaridit nang hanyar haja, nyata puas,” ujar garbus manyaranakan.
”kaya ini ja mak ai, kita batakun ka dealer haja dahulu, salajur balilihat mudelnya,” ujar palui mamadahi.
lalu buhannya tulakan ka dealer.
“ini bagus banar nah lui, kaluaran hanyar,” ujar tulamak.
“dasar harat mak ai, duit ikam cukup haja gasan uang mukanya,” ujar garbus maiihakan.
“aku kada katuju mak ai putungannya ganal,” ujar palui.
“hau, ikam ini mangalilu kah lui, awaknya nang halus ramping kaya ini ikam padahi putungannya ganal.
mata ikam kaur kah lui?” ujar tulamak kahiranan.
“mataku hawas banar mak ai, tapi putungannya ganal banar,” ujar palui pulang.
“kada mangarti aku lawan kawal kita saikung ini,” ujar garbus jua kahiranan.
“aku tu bapandir sabujurnya bus ai, cuba ikam takuni urang dealer tu nah, bujurlah putungannya ganal,” ujar palui lalu mangawai bibinian urang dealer.
“ada nang kawa ulun tolongi kah mang?” ujar bibinian tadi wayah baparak.
“kami ni rahatan
bahual sapida mutur ini ding ai, kawanku ini mamadahi potongannya ganal, padahal manurut kami putungannya halus lawan ramping, bujur kalu ding? ujar tulamak minta lawanakan.
“ampun pian bujur haja, amun putungan awak dasar ramping sabab ini kaluaran hanyar.
tapi ampun amang tadi bujur jua, sapida mutur ini putungan kariditnya taganal, sabab ini harganya talarang,” ujar bibinian urang dealer sakalinya paham nang di hualakan.
“bujur kalu, aku tadi mamadahi putungan kariditnya ganal limbah maitihi potongan di catatan ini, kadanya putungan awaknya pang,” ujar palui lihum.
“singhajanya mahual pulang,” ujar garbus wan tulamak kakalahan lalu mambawai bulikan.
(bpt/fai)
Sumber: tribunews[dot]com
Belum ada tanggapan untuk "Bahual Potongan"
Post a Comment
Note: Only a member of this blog may post a comment.