Pisang Biji

Hari semalam Ongol wan Anang Gabau disuruh Haji Untat memanen pisang nang ada dikebun. Pisang nang cagaran diputik bebuhan Ongol tu gasan dijual sidin dipasar karena buah pisang dikebun sidin sudah banyak nang masak. “Putikan pisang aku lah, bawa kerumah neh sekalian kena ambil upahnya,” ujar Haji Untat menyuruh Ongol wan Anang Gabau. “Siap Ji,” sahut Ongol pina mantap banaran wan pander.

Lalu bedua ne mendatangi kebun pisang nang ada disubarang Kampung Liur. Menuju kesana tu bedua ne naik jukung. “Ikam tukang kayuhnya lah, bulikan kena am aku nang mengayuhnya,” ujar Anang Gabau. “Bah ikam neh, tahu nyamannya ja,” sahut Ongol pina sangkal banaran. “Hahahaha, masalahnya tedahulu aku pang bepander daripada ikam Ngol ai,” ujar Anang Gabau. “Biasa wal, jagoan nya tu menangnya memang dibelakang eh, hehehe,” sahut Ongol. “Itu dalam sinetron Ngol ai, wakakakak,” ujar Anang Gabau mengangkang sampai kada meingat diri lagi.

Hitungan sepuluh menit bedua ne sampai kesubarang, lalu jukung nang ditumpanginya tadi diikatkan di jamban. “Kalu pina larut Ngol, ikat dibatang ja gin,” ujar Anang Gabau. “Maok pulang ikam neh, aur menyuruh ja, coba pang bantu kawan neh,” sahut Ongol tambah sangkal lagi. “Hahahaha, kalah pulang ikam Ngol ai. Makanya, siapa hancap inya nang menangnya,” ujar Anang Gabau. “Hi-ih hah, ikam memang jagoan,” sahut Ongol pina habang muha.

Handap kisah, jarak menuju kebun pisang pun Haji Untat ne lumayan jauh, bedua ne bejalan batis hampir 30 menit. “Jaka tahu tadi bawa sepeda ontel ja kesana. Jauh banar sekalinya, hehehe,” ujar Ongol. “Emangnya ikam bisi sepeda Ngol,” takon Anang Gabau sambil bejalan menuju ke kebun pisang. “Ada dong,” sahut Ongol. “Pun ikamkah, atau pun siapa. Hayooo,” ujar Anang Gabau. “Pun Haji Untat ah, hehehe,” sahut Ongol sambil garu-garu kepala. “Hahahaha, kalah pulang Ongol neh,” ujar Anang Gabau.

Tepaluh-paluh Ongol bejalan menuju kebun pisang pun Haji Untat. Baya sampai dikebun, matanya ne langsung melihat buah pisang nang menguning kulitnya. “Sikat aaaaah,” ujar Ongol sambil menjuhut 2 buting pisang masak. Lalu Ongol mengupas kulitnya, kada bebacaan lagi am buah pisang nang sudah kedida kulitnya langsung am diigutnya. “Aduh, sakiiiiittt,” ujar Ongol takuriak.

Mendangar Ongol takuriak, habut Anang Gabau. “Kenapa Ngol, apa nang ikam makan tadi,” takon Anang Gabau. “Pisangnya bebiji wal ai, patah gigiku nah,” sahut Ongol sambil meluakan pisang nang ada didalam muntungnya. “Astalah, hi ih lah. Pisangnya biji ne Ngol ai,” ujar Anang Gabau. “Ya am, sekalinya kebun pisang bebiji nang ditanam Haji Untat neh,” sahut Ongol. “Hahahaha, makanya, mun makan pisang tu bebacaan dulu. Jangan tahu sulum ja,” ujar Anang Gabau.

Tuntung memutik pisang lalu bedua ne mendatangi Haji Untat. “Biar pian bari berapa Ji ai, kada hakon ulun meambilnya. Kada kawa jua menggantikan gigi lun nang pacul gara-gara memakan pisang biji pun pian to,” ujar Ongol melapor wan sidin. “Hehehehe, sori Ngol aku tadi kada ingat bepadah. Tapi kada papa ja, tu pengalaman ikam,” sahut Haji Untat. Apada, masam ai muha Ongol. “Busyeet, harau diwaluhinya aku hari ini,” garunum Ongol sambil memusut-musut pipinya nang sakit lantaran gigi ditengahnya pacul karena makan pisang bebiji. (fin)

Sumber : radarsampit.net

Tweet

Jangan sampai ketinggalan postingan-postingan terbaik dari Portal Berita Online Kalimantan. Berlangganan melalui email sekarang juga:

Atau sobat juga bisa follow Portal Berita Online Kalimantan dengan mengklik tombol di bawah ini:

Artikel keren lainnya:

Ditulis oleh laso pada tanggal Sunday, November 25, 2012