Kahilangan

Kahilangan

SUDAH kabiasaan Palui wan kakawanannya, imbah tuntung sumbahyang Jumahat lalu batahan satumat umpat manggani’i kaum manyimpunakan hambal, tikar, sajadah wan mangumpulakan kutak celengan.Imbah tuntung basisimpun itu lalu bubuhannya barabahan sambil bapapanderan ka hulu ka hilir.“Bubuhan ikam kada umpat mahitung duit celengankah Lui?” ujar kaum masigit mambawai.“Ayu bubuhan sampiyan haja,” sahut Palui.“Kanapa maka kita kada manggani’i Lui?” ujar Tulamak.“Aku kulir kalu kaina pina tahilap-hilap Mak ai. Duit itu adalah sumbangan urang gasan masigit, badosa kalu manjumput atawa tasalip-salip ka kantung. Kalu bubuhan ikam handak manggani’i, silakan haja. Aku kada umpat,” ujar Palui.“Dasar putih hati Palui, mustinya mambantu mahitung duit sumbangan urang di celengan itu bapahala tapi inya malah takutan kalu tahilap-hilap jadi dosa,” ujar Garbus.Wayah bubuhan Garbus wan Tulamak manggani’i mahitung duit celengan, si Palui malah mangaruh taguring di higa mimbar parak paimaman. Di higa awaknya ada tuyukan sajadah wan kupiahnya. Imbah tuntung mahitung, lalu bubuhannya manggarak Palui mambawai bulikan.“Lui ayu lakasi kita bulikan, hari siang banar, parut sudah lapar,” ujar Tulamak sambil manggamit awak Palui.“Bubuhan ikam bapahala, aku sigar karna sawat guring,” ujar Palui sambil tangannya mahahar-hahar mancari sajadah wan kupiahnya.“Itu naah... kupiah ikam takipai ka parak mimbar. Mungkin tatarik kain pasahapan wayah dilipat tadi,” ujar Garbus manunjuk lalu maambilakan kupiah Palui itu.Sabalum mamakai kupiahnya, Palui mambuka-buka lipatan kupiahnya, sambil bapikir wan maingat-ingat.“Napa dipikirakan Lui, lakasi puruk kupiahnya,” ujar Tulamak.“Anu..., siapa tadi mamindah kupiahku?” ujar Palui.“Kami kadada nang mamindahnya, maka tadi kusambat taumpat tatarik kain pasahapan wayah digulung kaum,” ujar Garbus.“Adakah nang hilang maka pina bingung,” ujar Tulamak.“Anuu... duitku lambaran Rp 100 ribu nang kusalipakan di kupiah ini kadada lagi,” ujar Palui pina handak manangis.“Ooo... aku tadi wayah mahitung duit di celengan ada kulihat lambaran duit Rp100 ribu. Mungkin duit ikam, karna gugur lalu ada nang mamasukakan ka dalam celengan,” ujar Garbus manyahut.“Balum tantu Bus ai, balum tantu duit Palui ai, bisa haja ada urang nang basadakah duit lambaran saratus ribu,” ujar Tulamak.“Hi’ih-lah, bisa haja ada urang nang basadakah duit lambaran saratus ribu itu” ujar Palui kada wani maakui bahwa itu duitnya.“Ihlasakan haja Lui ai, walaupun ikam marasa kahilangan tapi anggaplah ikam sudah basadakah jua ka masigit ini. Magin ganal duit nang ikam sadakahakan, magin ganal jua pahala ikam,” ujar Garbus mahibur Palui nang taungut. (rep/tam)



Terkait#Palui#Kisah si Palui


Source from: banjarmasin[dot]tribunews[dot]com

Tweet

Jangan sampai ketinggalan postingan-postingan terbaik dari Portal Berita Online Kalimantan. Berlangganan melalui email sekarang juga:

Atau sobat juga bisa follow Portal Berita Online Kalimantan dengan mengklik tombol di bawah ini:

Artikel keren lainnya:

Ditulis oleh laso pada tanggal Sunday, September 21, 2014