|
Dicucuki Kakanakan |
PAS malam panutupan karasminan tujuh belasan di kampung Palui kamarian, acaranya di isi lawan bawayang. Maka camat baistilah manyiwa buhan pawayangan matan Barikin nang tarkanal. Amun sudah wayang, Palui wan kakawanannya pasti paling basumangat manuntun.“Amun aku pasti kada katinggalan, tapi nang ngalihnya anakku handak jua umpat malihat,” ujar Garbus pina sakit hati mambawa anak.“Nah iya am, sakalinya sama kita bus ai. Anakku batangsa jua handak umpat,” ujar Palui.“Baarti bubuhan anak kita bajanjian matan sakulahan,” ujar Tulamak.“Kanapa jadi ikam tahu mak?” ujar Garbus manakuni Tulamak.“Anakku batagih umpat jua, nang ngalih tu kita kada kawa bagadang,” ujar Tulamak.“Kita bawa haja Mak ai mun kaya itu, biar inya bakawanan sampai inya mauk surangan. Bila mangantuk antar bulik,” ujar Palui manangahi.Malamnya Palui, Tulamak wan Garbus tulakan manuntun, tapaksa masing-masing mambawa anak. Sampai di lapangan wayah bubuhannya manuntun, nang anak bamainan. Biasanya imbah tangah malam puncaknya, pas rahatan raramiannya pandawa lawan kurawa bakalahi. Kaluar tu pang sagala macam sanjata tamasuk pasukan samar umpat jua bakalahi. Tapi kanapakah malam ini hanyar jam sapuluh dalang Su Idar sudah hamuk banar.“Awas bubuhan ikam lah, limbah bulik kaena kupukuli!” ujar dalang Su Idar hamuk sambil mandalang. Bagarak kasana kamari wayangnya.“Hau, kanapa kisahnya jadi kaya ini?” ujar Palui bingung.“Ikam jangan macam-macam lah, hadangi tahu rasa ikam kaena kupukuli,” ujar dalang manyumpah-nyumpah.Panonton bingung barataan mandangar dalang hamuk, kisahnya tapuntal pulang.“Kalu kusambur lawan liurku tahu rasa ikam,” ujar dalang bahantak ka lantai sambil wayang umpat bagarak.“Kanapa jadi dalang hamuk badahulu, kada ingat basalamatan kah?” ujar Tulamak.“Kira-kira mak ai... sidin kaya urang kasakitan burit tu nah,” ujar Garbus malihati kalakuan dalang.“Hadang dahulu, anak buah kita mana?” ujar Palui pina curiga.“Napa ikam mancari kakanakan Lui. tadi talihat bamainan di parak panggung,” ujar Garbus.“Ayu capati kita pariksa, aku asa curiga dalang ni hamuk karna digawi anak buah kita,” ujar Palui bagagas manuju bawah panggung.Limbah inya manjinguk, sakalinya anaknya Tulamak, Garbus wan anaknya sorang ada dibawah lantai panggung sambil manyucuki burit dalang Su Idar lawan bilah lidi.“Cucuk haja dalang hamuk badahulu, napa amun burit sidin dicucuki wan bilah lidi,” ujar Palui kasasarikan. (fai/rep)
Terkait#Palui#Kisah si Palui
Source from: banjarmasin[dot]tribunews[dot]com
Artikel keren lainnya:
Belum ada tanggapan untuk "Dicucuki Kakanakan"
Post a Comment
Note: Only a member of this blog may post a comment.