 |
| Mambayariakan Hutang |
MULAI lagi halus sampai sudah babini, Palui tamasuk urang nang hidup nyaman dibanding kakawalannya Garbus, Tulamak wan Tuhirang.Sadangkan Tulamak walaupun abah umanya kada sugih, tapi imbah kayinya maninggal inya banyak dapat bagian warisan, pahumaan, kabun wan rumah.Ikam tamasuk bauntung banar Mak ai, wayah ini banyak mandapat warisan ujar Garbus.Biarpun banyak mandapat warisan, kada dibulihakan gasan basanang-sanang karna ada wasiat supaya diharagu gasan mambiayai kaluarga wan kamanakan-kamanakan. Aku kada hakun kaya Palui nang hidupnya katuju bararamian mahambur duit kuitan, ujar Tulamak.Hiih bujur haja Mak ai, kalu ada wasiat supaya dipatuhi jangan dilanggar. Harta warisan ini paling baik gasan diamalakan, dihadiahakan ka masigit, yatim piatu wan langgar karna pahalanya cagar tabulik wan kayi ikam jua, jadi amal jariah, ujar Garbus.Aku katuju banar pandapat wan anjuran Garbus itu Mak ai, hususnya nang manyangkut manyantuni anak yatim piatu karna sasuai anjuran alquran surah Al-Maun, ujar Palui.Aku himung banar pandapat Palui nang mangaitakan antara harta warisan wan suruhan agama. Tulung doa haja Lui ai mudahan aku kawa malaksanakannya, ujar Tulamak himung.Badasarkan pangalaman wan kabiasaan kita bakawan wan Palui ini, tiap ada ucapannya mamuji atawa maambung pasti... pasti ada buntutnya, ujar Garbus pina manyindir.Bujurkah Lui ada buntutnya ucapan ikam itu? ujar Tulamak handak mambuktiakan sindirian Garbus.Aku bapander ini kada bakukulitan Mak ai. Santunilah anak yatim piatu, makanyaaa... jangan kada ingat bagianku, ujar Palui mambuka kahandaknya.Naahhhh.... pas kalu tangguhanku Mak, ujar Garbus.Napa hak ikam dapat bagian Lui? ujar Tulamak.Kalu ikam wan Garbus masih ada abah wan uma, tapi aku sudah habis kaduduanya, makanya aku tamasuk anak yatim piatu nang harus disantuni ujar Palui.Ikam itu tasalah tafsir Lui ai. Sabujurnya santunan ini harus disampaiakan kapada yatim piatu nang miskin. Sadangkan ikam tamasuk yatim piatu sugih karna sudah mandapat jua warisan matan kuitan ikam, ujur Tulamak manyindir.Nasibku babida wan nasib ikam Mak ai. Kalu ikam mandapat banyak warisan harta banda kabun wan pahumaan tapi aku mandapat warisan mambayariakan hutang-hutang abahku, ujar Palui pina sadih sambil mamusut matanya minta dikasihani. (bp/tam)
Terkait#Palui#Kisah si Palui
Source from: banjarmasin[dot]tribunews[dot]com
Artikel keren lainnya:
Belum ada tanggapan untuk "Mambayariakan Hutang"
Post a Comment
Note: Only a member of this blog may post a comment.