Korban Jembatan

Hari semalam jembatan wadah bebuhan Ongol bedudukan dibungkas Haji Untat, tapi kadanya dibungkas budas paan melainkan dibaiki sidin karena jembatan itu tu sudah telihat jabuk. Kekawalan Ongol ne sudah tahu am bahwa jembatan itu tu cagaran dibungkas Haji Untat. Tapi, si Ongol ne kada tahu paan.

Imbah sembahyang magrib Anang Gabau wan Dangdut handak melihat jembatan nang dibaiki oleh sesepuh Kampung Liur. “Ke jembatan kah kita,” ujar Anang Gabau. “Okey wal, aku handak kesana jua neh,” sahut Dangdut pina semangar bebanaran. “Ikam kesana apa nang dilihat,” takon Anang Gabau. “Melihatinya ai, hehehe,” sahut Dangdut sambil takurihing sorangan.

Handap kisah, dalam perjalanan menuju jembatan wadah biasa bebuhannya badudukan, tiba ada si Ongol lewat pakai sepeda ontel. “Woooiii, kemana an to,” takon Ongol. “Handak ke jembatan Ngol ai,” sahut Anang Gabau sambil bakuriak. “Yak ah, aku gin kesana jua nah. Tapi, aku badahuluan laaah,” ujar Ongol sambil ngebut. “Busyet jua si Ongol neh. Ngebut ja gawiannya,” garunum Anang Gabau.

Baya sampai di jembatan, bedua ne tekajut pas melihat si Ongol ada dibawah jembatan wan sepeda ontelnya. “Kenapa Ngol ikam bisa tecabur wan sepeda ontel ikam to,” takon Anang Gabau tumatan atas. “Tolongi am, kena aku kisahkan,” ujar Ongol. “Iyakah, hadangilah setumat. Aku kiyaukan buldoser dulu.. wakakakak,” ujar Anang Gabau. “Bore ikam to, kawan lagi kesusahan malahan begaya pulang,” sahut Ongol pina sangkal banaran wan kelakuan kekawalannya.

Kada berapa menit akhirnya Ongol kawa naik kedaratan, sambil memeras baju nang basah lantaran tecabur wan sepeda ontelnya tadi. “Kaya apa kisahnya bisa tecabur ikam tadi Ngol,” takon Anang Gabau. “Anu wal ai, kada melihat jembatan kita dibungkas handak dibaiki, maka laju banar aku tadi tu. Kada sempat lagi am meremnya, akhirnya tecabur ai,” ujar Ongol mengisahkan kenapa inya bisa tecabur tadi.

Mendangar kisah si Ongol ne tadi, harau mengangkang ai bedua neh. “Hua hahaha, makanya jangan biasakan mengebut, untung gugurnya ke banyu. Jakanya ke batu bisa innalillah am ikam Ngol,” ujar Anang Gabau. “Jangan kaya itu wal ai, handak jua hidup lawas neh, hehehe,” sahut Ongol. “Makanya, hati-hati eh mun basepada to,” ujar Anang Gabau menasehati.

Kada berapa menit datang Haji Untat. “Tecaburkah ikam tadi Ngol,” takon Haji Untat. “Inggih Ji ai,” sahut Ongol. “Memang segaja aku ai kada meandak plang sebelum di jembatan ne. Aku tahu ja bebuhan Kampung Liur ne katuju kebut-kebutan walaupun pakai sepeda. Supaya inya jara ja, makanya kada aku andak paan plangnya to. Hahahaha. Ikam jadi korban pertama Ngol ai,” ujar sidin. Harau, berot ai muha bebuhannya nang ada di jembatan. (fin)

Sumber: radarsampit.net

Tweet

Artikel keren lainnya: