Baca Yasin

HARI semalam di Kampung Liur ada nang meninggal dunia, seperti biasa bebuhan kampung ne mun ada kematian hancap ja membantu. “Sudah siap kalo semuanya,” takon Haji Untat. “Sudah Ji ai, buhan penabukan gin sudah menabuk kuburannya am. Tinggal membawanya ja,” sahut Ongol. “Mantaab, memang mantab bebuhan Kampung Liur neh,” ujar sidin memuji.

Handap kisah, imbah penguburan lalu Haji Untat memadahkan bahwa imbah magrib baselamatan. “Ba’da magrib kita disuruh baselamatan dirumah duka. Ne pesan bebuhannya,” ujar sidin. “Insya Allah,” sahut Ongol sambil membersihkan tangan wan batis nang batepal wan tanah pekuburan.

Kada terasa waktu sudah magrib, imbah salat berjamaah lalu bebuhannya kumpul dirumah duka. “Nang diluar masukan, kita bebacaan yasin,” suruh Haji Untat. “Ayo am Ngol, ikam bisa tu masuk ja,” ujar Anang Gabau. “Kada bisa baca quran aku neh,” sahut Ongol. “Mana Ongol neh,” takon Haji Untat. “Apa jar Haji Untat tu nah, ikam disuruh masuk. Lakasi,” ujar Anang Gabau. Akhirnya Ongol masuk jua. Ongol ne duduk disebelah Haji Lului. “Ne yasin gasan ikam Ngol,” ujar sidin sambil meunjuk ke Ongol buku yasin nang halus. “Nah iya am, aku kada bisa membaca tapi dipaksa jua,” garunum Ongol. “Inggih Ji,” sahut Ongol sambil tekurihing.

Pemulaan Ongol ne nahap ja membacanya. “Bismillahirrahmaaanir rahiiim, yaaasiiiin,” ujar Ongol. Sementara nang lainnya melanjutkan, sedangkan Ongol sudah mulai hinip am. “Kenapa muntungnya ja nang komat kamit. Mana suaranya,” tagur Haji Untat nang ada dihiga Haji Lului. Tapi Ongol ne hinip ja kada hakon paan bepander.

Imbah itu ditakon sidin pulang. “Hau, kenapa hinip Ngol, bisa jua kah ikam membacanya,” takon sidin pina gemet banaran. “Anuah Ji, lun kada bisa paan membacanya. Nang ulun bisa bacaan bismilah wan yasin tu ja,” sahut Ongol. “Sama ai Ngol ai. Aku gin kada bisa jua, hehehe,” ujar Haji Untat.

Sekalinya, Ongol wan Haji Untat ne kada bisa baca quran. Nahap ja pang wan buku yasin halus ditangan. Tapi kedida nang bisanya membawanya. “Iya am, kada hakon belajar pang nangkaya ini am nasibnya,” ujar Haji Untat. Mau kada mau ai, bedua ne supaya kada ketahuan kada bisa membaca quran, paksa ai muntungnya komat kamit seolah-olah bisa membacanya walaupun didalam hati.

Akhirnya, kada berapa menit tuntung jua urang bebacaan yasin. Imbah itu doa dan diteruskan wan makan-makan. “Nang akan datang supaya kada supan lun belajar ja Ji ai, hehehe,” ujar Ongol. “Aku gin, sudah jadi haji ne supan jua mun kada bisa baca quran,” ujar Haji Untat. (fin)

Sumber : radarsampit.net

Tweet

Artikel keren lainnya: