Katuju Calap

Katuju Calap

kampung palui taumpat jua tarandam nang kaya kampung lain.
padahal, tahun-tahun dahulu kada suah calap sampai bakilankilan kaya ini.
tapaksa ai, saban ka luar rumah, palui manyingsing salawar katuknya.
padahal, salawarnya itu sudah handap parak sampai ka lintuhut.
samuaan urang maniwas bahwa calap nang sing dalaman ini lantaran hutan nang ditabangi sampai gundul.
akibatnya, pas hujan daras kadada lagi nang mahalangi banyu turun ka sungaisungai.
ada lagi nang mamadahakan, calap yang tinggi banar ini gara-gara pamarintah kada kawa manata bangunan nang hanyar-hanyar.
bangunan-bangunan nang harusnya kada mahambat jalan banyu.
rumah-rumah wayah ini kada mamakai mudil panggung lagi kabanyakan mamakai mudil ba-cor samen.
tapi lain wan palui.
inya malahan katuju wan kaadaan calap itu.
rumah-rumah di pinggir sungai maulah sungainya jadi dangkal lui ai, makanya kada kawa manampung banyu nang sing banyakan, ujar tulamak mamandiri palui wan garbus sambil bakucak banyu di jalan.
tapi lui, kanapa ikam ini pina lihum haja kada kaya nang lain nang garunuman kacalapan? ujar garbus manakuni palui nang pina katuju haja jalan calap tarus.
kada apa-apa, bus ai.
kampung kita ini kada suah marasai calap, jadi sakali-kali tarasai kada apa-apa jua, ujar palui manyahut.
iih, bujur lui ai ujar ikam itu.
tapi, batis amun kalawasan barandam di banyu rigat kaina balancatan, ujar tulamak malawanakan  garbus.
bubuhan ikam ini jangan bapikir nang kada baik lawan calapnya kampung kita ini.
pasti ada hikmah di dalamnya, ujar palui pulang.
kada usah bapander hikmah lui ai, calap ini lainan hikmah malah manurutku adalah buah dari parbuatan bubuhan kita jua,? ujar garbus.
kada nang kaya itu pang bubuhannya ai, lakiku ini katuju jalan calap supaya inya kada katahuan bajalan kada basandal, ujar bini palui manyahuti bakajutan.
sandalnya, samalam pagat talinya dan kada kawa lagi disambung.
handak manukar kadada duitnya, ujar bininya manambahi.
pas kabalujuran hujan labat saharian samalaman lalu maulah calap, pas ai lakiku katuju banar karna kawa bajalan kada usah basandalan.
ikam ni kada kawa manyimpan rahasia lalu.
tahu laki kada baduit, jangan disambati pang, ujar palui bajauh kakalahan.
tulamak wan garbus tatawaan malihat palui nang maraju rabusrabus bajalan di banyu calap.
(bpt/ani)


Source from: banjarmasin[dot]tribunews[dot]com

Tweet

Jangan sampai ketinggalan postingan-postingan terbaik dari Portal Berita Online Kalimantan. Berlangganan melalui email sekarang juga:

Atau sobat juga bisa follow Portal Berita Online Kalimantan dengan mengklik tombol di bawah ini:

Artikel keren lainnya:

Ditulis oleh laso pada tanggal Sunday, May 5, 2013