Panyakit Mangaluar

palui /itu tamasuk anih jua, sudah samingguan ini inya hilang pada rumah. nang anih nya lagi anak bininya di rumah pun kada tahu kamana inya."kita kada usah hawatir mak ai karna inya sudah tuha jua pasti bisa haja bapikir baik  buruk nang digawinya," ujar garbus."biarpun sudah tuha, baiknya bapadahlah bila handak kamana-mana, supaya jangan ba-asanan atau bila ada kajadian napa-napa nyaman mancarinya," ujar tulamak."palui itu dasar wataknya kaya itu, tatutup, kada hakun barunding atawa bamusyawarah bila ada napa-napa," ujar garbus."itu artinya inya urang nang batanggung jawab, pikir saurang dan gawi saurang," ujar tulamak."kalu sudah bakaluarga dan banyak kawan mustinya barakat- rakatlah, rundingkan bila ada masalah. jangan diutaki saurangan haja karna sahaharatnya manusia tatap mamarlukan urang lain," ujar garbus manilai palui."tapi aku himung banar baisian kawan si palui itu, jarang dan kada biasa sarik, paling-paling inya badiam, suka manulung dan palihum banar. biarpun dimamai tatap haja inya lihum, kacuali disariki banyaring hanyar inya mambalas," ujar tulamak."aku paham haja bubuhan ikam musti mamander aku karna aku babarapa hari kada ka warung acil ini," ujar palui cangul bakakajutan sambil lihum."nah, pas kalu tangguhanku, pasti inya lihum," ujar tulamak."ikam tulak kamana lui maka babarapa hari ini kada cangul-cangul," ujar garbus manakuni."hari hujan tarus bus ai, pahumaan rusak rusak tarandam, haraga baras balarang," sahut palui sambil lihum."aku batakun, ikam tulak kamana babarapa hari ini kada kalihatan," ujar garbus maulangi tatakunannya."hi'ih dalam sahari dua ini aku mudik mailangi mamarina nang handak mangawinakan anaknya," sahut palui sambil lihum."kada nyambung, kada nyambung.... mangaluar panyakitnya," ujar tulamak mulai paham sambil manggamit garbus."hi'ih, bila awakku panas maka talingaku manginging, bunyi mangguruh kada karuan dangar," ujar palui manyahut ucapan tulamak nang mamadahakan mangaluar panyakitnya."nah, tanyata inya mandangar haja mak ai," ujar garbus."ngalih mamanderi si bolot ini, taguh dipanderi," ujar tulamak manumpalak karna inya tahu bahwa palui ini wayah lagi halus bapanyakit curik hingga bila awaknya panas lalu kada tapi mandangar alias tutulian. (emhati/rep)/ )
sumber: tribunews[dot]com

Thursday, February 7, 2013