Awal tahun bebuhan Ongol meadakan acara di tengah-tengah Kampung Liur yakni bedangdutan. Nang hadir bebuhan sesepuh kampung nangkaya Haji Untat, Haji Lului wan Haji Walet. Bebuhannya kada mendatangkan artis luar kampung paan melainkan bebuhan kampung tu am nang jadi artisnya. “Kita pamali mun menyewa artis luar kampung. Di Kampung Liur neh banyak artisnya. Iya kalooo,” kuriak Haji Untat. “Iyaaaaa, hidup Haji Untaaaaattt,” ujar Ongol umpat jua bakuriak. Apada, geleng-geleng ai kepala sidin pas mendangar kuriakan si Ongol tadi.
Handap kisah, tuntung menjelaskan tentang persoalan Kampung Liur lalu sidin mempersilahkan acara dilanjutkan wan hiburan yakni bedangdutan. “Ayo Ngol, angkat selagu dulu nah,” ujar Anang Gabau pina kehimungan sorangan. “Kada bisa benyanyi neh. Bisa bajoget ja,” sahut Ongol. “Nah pas banar tu Ngol ai. Mumpung kedida tukang jogetnya neh. Hahahaha,” ujar Anang Gabau. “Okey sip,” sahut Ongol sambil menuju ke atas panggung.
Melihat Ongol naik keatas panggung, harau tepuk tangan bebuhan Kampung Liur. “Ayo Ngol, selagu dulu biar kita tehibur,” kuriak Amang Bular nang jadi penonton. “Lagu ayu ting-ting Ngol,” kuriak Siti Asoy. “Lagu keroncong ja Ngol,” ujar Utuh Karas. “Hahahaha, aneh-aneh ja ikam neh. Kedida ah lagu keroncong di sini neh,” sahut Utuh Kalubut. “Sengaja aku ai. Hahahaha,” sahut Utuh Karas. Apada, geleng-geleng kepala ai Utuh Kalubut dapatnya Utuh Karas.
Lagu nang dibawakan Anang Gabau neh lagu sakit gigi. “Gasan pembukaan, lun bawakan lagu sakit gigi,” ujar Anang Gabau pina semangat banaran. Mendangar sakit gigi, harau habang muha Haji Untat. “Busyet, tahu jua inya neh sekalinya aku lagi sakit gigi. Pas dibawakan lagu sakit gigi pulang,” garunum sidin. “Imbah lagu sakit gigi neh lun nyanyi lagu wali, dasar bajingan. Kaya apa menurut buhan pian. Setuju ja kaloooo,” ujar Anang Gabau. “Setujuuuu,” sahut bebuhan kampung.
Lagu sakit gigi itu pun dinyanyikan Anang Gabau, jingkrak sana sini Ongol diatas panggung sampai ada papan nang patah. Krek, kayu sebuting ditengah patah. “Bah iya pang. Cagaran runtuh neh,” garunum Ongol. Tapi inya neh kada bepadah paan ada papan nang patah dijajak inya tadi. “Daripada dimamai mending behinip ai, hehehehe,” ujar Ongol bapande sorang didalam hatinya.
Pertengahan lagu sakit gigi nang dinyanyikan Anang Gabau tadi, melihat Ongol pina kehimungan bajoget diatas panggung. Sangkal jua Acil Jablay. Sidin naik jua ke atas panggung. “Acil Jablay umpat jua bajogetan,” ujar Ongol. “Lanjuuuuttt,” ujar Haji Walet. Apada, pina mehantak banar sidin neh mengoyang buritnya nang ganal. “Ayak Ciiill. Hua hahahaha,” ujar Utuh Karas. “Jangan tapi behimat behantak Cil, kalo pina runtuh panggung,” kuriak Utuh Kalubut.
Hanyar pang Utuh Kalubut ne bakuriak tedangar am suara nyaring. Bruaaaakkk… papan ditengah panggung patah. Acil Jablay wan Ongol temasuk teumpat wan papan nang patah tadi turun ketanah. “Huaaaa.. kepehe kahang,” ujar Ongol. “Kenapa bisa kepehe kahang Ngol,” takon Haji Untat. “Ditindihi Acil Jablya Ji ai. Awak lamak bepikul-pikul baratnya menindahi ulun. Makanya kepehe kahang nah,” sahut Ongol.
Mendangar pander Ongol tadi, harau mengangkangan bebuhannya. “Untung pang Cuma kepehe kahang. Jakanya patah pinggang bisa kada kawa bajogetan pulang am,” ujar Haji Untat. Walaupun papan kayu ditengah panggung patas, bajogetan lagu dangdut terus ja belanjut sampai akhirnya imbah asyar ampihan am. (fin)
Sumber : radarsampit.net
Belum ada tanggapan untuk "Bebuhan Ongol Bajogetan"
Post a Comment
Note: Only a member of this blog may post a comment.