Hari semalam Ongol disuruh Haji Untat menukarkan pipa galon gasan menggantikan pun sidin nang rusak. Maklum, pipa galon nang sudah ada tu sudah tuha am dimakan usia tumatan sidin bujang sampai bisi cucu. Jadi, selawasan itu am kada pernah diganti sidin. “Ngol, tukarkan pipa galonlah,” suruh sidin. “Inggih Ji,” sahut Ongol pina mantab banaran.
Mendangar disuruh sidin, himung ai Ongol neh karena biasanya setiap disuruh pasti am ada upahnya. “Pakai motor piankah ulun ketoko neh Ji,” takon Ongol. “Sampai kada batis ikam menunggang motor ganal pun aku neh,” sahut sidin. “Sampai Ji ai, awak lun neh tingginya handak mendua ratus meteran,” ujar Ongol pina musti wan muha. “Hahahaha, asa kedida zaman ikam neh tinggi awaknya 200 meter. Salah sambat ikam neh Ngol ai,” ujar sidin. Apada, masam ai Ongol neh. “Hehehe, salah sambat Ji ai, tinggi ulun Cuma 150 meter,” sahut Ongol pina supan muha.
Handap kisah, pina telihat himung pang Ongol neh pas menunggangi motor ganal pun Haji Untat. Lewat dihadapan kekawalannya langsung bemandak disitu am. “Mumpung dipinjami sidin, hehehe,” ujar Ongol pina cakah banaran. “Kada usah cakah paan Ngol ai, pun urang jua. Nyaman pun surang daripada pun urang,” ujar Anang Gabau menasehati. “Kada salahnya jua wal ai dipinjami. Aji mumpung, hahaha,” sahut Ongol sambil meninggalkan kekawalannya.
Sesuai wan tugas, lalu Ongol mencari pipa galon keliling ke Kampung Liur. Pas dihiga warung Acil Jablay Ongol ne bemandak. “Toko apa disana tulah, kada kah toko urang nang bejual pipa galon,” garunum Ongol sambil matanya bepajam tebincak meitihinya tumatan jauh. “Pina telihat urang bajual pipa galon pang,” ujar Ongol pina semakin penaran banaran.
Merasa penasaran, lalu Ongol singgah sambil memarkirkan sepeda motor ganalnya dihadapan toko nang dikira inya tadi toko bajual pipa galon. “Cari apa pian Bang,” takon pelayan toko nang bengaran Siti Asoy. “Ada bajual pipa galon kah,” ujar Ongol. Mendangar pander Ongol ne tadi, harau mengikik Siti Asoy. “Kikikikikikik… Ne toko bajual alat motor Bang ai, kedida bajual pipa galon paan,” ujar Siti Asoy sampai teliur-liur ketawa mengetawai si Ongol nang tesalah toko.
Rupanya Ongol ne kada mau kalah jua. “Itu pang apa to,” takon Ongol sambil menunjuk kearah nang begantung diatas Siti Asoy bediri. “Itu selang angin Bang ai. Gasan mengompa ban, wakakakak,” ujar Ongol. apada, habang muha Ongol, lalu bulik menjuur kada bepadah lagi am. Sekalinya pelihat Ongol tumatan jauh tu tadi, selang angin dikiranya pipa galon. (fin)
Sumber : radarsampit.net
Belum ada tanggapan untuk "Pipa Galon"
Post a Comment
Note: Only a member of this blog may post a comment.