Tecabur

Hari semalam Ongol umpat Haji Untat keluar Kampung Liur, nang dibawai sidin mendatangi kebun sawit kada si Ongol ja nang dibawa melainkan ada Anang Gabau, Dangdut wan Amang Bular. “Naik apa kita Ji ke subarang to, kelotokkah atau bajukungan ja,” takon Ongol. “Naik kelotok ja Ngolai, kalo pina ikam kada sanggup mengayuhnya. Gelombangnya ganal Ngol ai,” sahut Haji Untat. “Pina musti ja Ongol ne Ji ai,” ujar Anang Gabau. “Hehehehe,” sahut Ongol sambil takurihing.

Kada berapa menit kelotok datang merapat ke dermaga Kampung Liur, lalu baempat ne naik dan duduk diatas kelotok. “Lawas lah Ji mun kesubarang to,” takon Ongol. “Lumayan Ngol ai, mun ikam baroko bisa habis 2 pucuk hanyar sampai,” sahut Haji Untat. “Buktikan Ngol,” ujar Dangdut. “Jangan ah wal, masa kita kada percaya wan pander sesepuh kampung kita neh,” sahut Ongol.

Gelombang ganal rahatan bebuhannya menuju ke subarang ke kebun sawit pun Haji Untat, merasa pina lawas sampainya lalu ai si Ongol ne merasakan duduk dihujung kelotok. “Handak kemana ikam Ngol, kalo pina tecabur, tahu rasa,” ujar Anang Gabau. “Handak duduk dihujung kelotok tu nah,” sahut Ongol pina musti banar wan pander. “Hati-hatilah kalo pina tecabur,” tagur Haji Untat. “Inggih Ji, tenang ja pian lun neh bisa ja bakunyung,” sahut Ongol.

Handap kisah, pina telihat himung banaran Ongol ne rahatan duduk dihujung kelotok, bebuhan kekawalannya pina meharit banar kalo pina inya tu tecabut ke sungai. “Cieeeeeaaaaa, asik wal. Gelombang tu nah, hehehe,” ujar Ongol pina kehimungan banaran. “Jangan tapi balecak kau lew, kalo pina tecabur,” tagur Anang Gabau. “Tenang wal, wakakakakak,” sahut Ongol pina beborean banaran.

Rahatan asik duduk di hujung kelotok, tiba-tiba gelombang ganal mehantam kelotok nang ditumpangi bebuhan Haji Untat. “Awas Ngoooolll,” kuriak Anang Gabau. Rupanya Ongol ne kada sampat lagi am bapingkut di tali, apada, tecabur jua ai akhirnya inya neh. “Toloooonggg,” kuriak Ongol. Melihat Ongol tecabur, harau mengangkang bebuhannya. “Hua hahahahaha, jar pang tenang ja. Kenapa sekarang bekuriak minta tolong,” ujar Anang Gabau.

Untung pang, tukang kelotok ne hakon ja bebulik mendatangi si Ongol nang tecabur tadi. Pas ditolongi malahan inya ne dimamai Haji Untat. “Makanya jangan pina musti paan Ngol ai, ikam tu sama ja tekabur, sombong istilah bahasa Indonesia tu eh,” ujar sidin. “Inggih Ji,” sahut Ongol pina liut wan dagu ditunduk. “Iya am, ditagur kada tetahu muha eh,” ujar Anang Gabau menambahi.

Akhirnya, si Ongol ne supan sorang karena kecakahannya tadi. “Lun janji Ji ai, kada cakah lagi am,” ujar Ongol bejanji. Apada, mau kada mau ia si Ongol ne baju wan selawar basah dan karing diawak tu am lantaran inya ditagur kada tahu muha paan. (fin)

Sumber: radarsampit.net

Tweet

Artikel keren lainnya: