Rantai Motor

Malam minggu di Kampung Liur ada konser musik mendatangkan artis ibukota, mendangar cagaran rami di taman bebuhan Ongol berencana cagaran hadir jua menonton konser musik nang diadakan oleh Haji Untat.

“Kita nonton konser kah malamg minggu ne,” takon Ongol. “Nonton dong, mumpung ada hiburan malam minggu kawa juga becari cewe, hehehe, sahut Anang Gabau. “Ikam pang Dut, umpat juakah,” takon Ongol. “Umpat dong,” sahut Dangdut.

Handap kisah, pas malam minggu bebuhan Ongol siap-siap handak tulak ke taman Kampung Liur wadah konser musik diadakan. “Naik apa kita kesana wal,” takon Ongol. “Naik sepedakah,” sahut Dangdut. “Menyupani ja naik sepeda, wayah ne wal ai bebinian kada hakon lagi am wan lakian pakai sepeda. Ketinggalan zaman jar,” ujar Anang Gabau. “Terus kita apa am, sepeda motor kedida wal ai kecuali menyewa pun Haji Walet. Kaya apa,” takon Ongol. “Okeylah kalo begitu, daripada kita naik sepeda mendingan naik motor, hehehe,” sahut Dangdut.

Lalu bebuhannya memutuskan naik sepeda motor sewaan. “Ikam ja nang membonceng Ngol ai,” ujar Anang Gabau. “Akui, mun betiga ne tengalih pang menyetirnya nah,” sahut Ongol pina bealasan bebanaran. “Kada papa ja mun rusak kita ganti sama-sama,” ujar Anang Gabau. “Okelah kalau itu memang perjanjiannya,” sahut Ongol pina mantap banaran wan pandernya.

Kada berapa menit sampai jua bebuhan Ongol di taman Kampung Liur. Disitu banyak bebanaran bebuhan Kampung Liur keluar dari sarang hanya handak menyaksikan konser musik. “Harau bekajal banar, maklum kampung kita ne jarang ada hiburan. Sekali diadakan sekampungan datang,” ujar Ongol. “Iya am, ngalih ai bebuhan kampung haus hiburan,” sahut Anang Gabau.

Tuntung menonton konser musik, lalu bebuhannya handak bulik an. “Dimana kita meandak motornya tadi,” takon Anang Gabau. “Dipadang sabat sana wal ai,” sahut Ongol sambil bebuhannya menuju kepadang sabat nang disambat Ongol tadi.

Mesin motor sudah dihidupkan, bebuhannya sudah duduk diatas jok motor. “Kita bulik ne singgah dulu diwarung Acil Jablay handak menukar roko cap pekat,” ujar Anang Gabau. “Okey wal,” sahut Ongol sambil menggaskan motornya.

Ngooong, ngooooong, ngoooooooong, bunyi knalpot motor pina nyaring banaran tapi motornya kada bejalan. “Hau Ngol, kenapa kada jalan motornya neh,” takon Anang Gabau. “Sudah aku masukan giginya am, sudah aku gas tinggi tapi tetap ai kada jalan,” sahut Ongol. “Coba pang periksa dulu,” ujar Dangdut.

Lalu betiga ne turun dari atas motor dan handak melihat kesalahan apa nang ada sehingga motor kada bisa bejalan. “Astagaaaaa, rantai motornya hilang,” ujar Ongol. Mendangar pander si Ongol ne tadi, harau masam muha bebuhannya. “Bah iya pang, gara-gara meandak motor dipadang sabat rantai motor dicabut urang,” ujar Anang Gabau.

Harau mandam betiga ne memikirkan rantai motor hilang dicuntan maling. “Cagaran mengganti am kita wal ai wan cagaran bulik bejalan, wakakakak,” ujar Anang Gabau. “Kada hakon paan aku bulik bejalan, lebih baik aku naik ojek,” sahut Dangdut. “Aku gin naik ojek jua,” sahut Anang Gabau.

Apada, tetinggal si Ongol ai nang mehirit sepeda motor bulik kerumah wan langsung meantarkan kerumah Haji Walet. “Rantainya hilang Ji ai dicuntan maling,” ujar Ongol. “Kada dicuntan maling paan Ngol ai, rantainya tu memang belapasan paling gugur dipadang sabat,” ujar Haji Walet. Mendangar pander sidin tadi harau behancap Ongol bebulik pulang ke taman Kampung Liur mencari rantai sepeda motor nang lepas dari motornya. (fin)

Sumber: radarsampit.net

Tweet

Artikel keren lainnya: