Harat Dipandang

Harat Dipandang

BULANG bulik ka Banjar atawa ka Jawa bagi Palui sudah kada asing lagi artinya kada cagar sasat kada kawa dibunguli lagi ulih supir atawa tukang bica. Inya sudah tahu liku-liku jalanan dimana jalanan nang sa arah dimana harus bapiluk atau kada bulih dilalui. Karna dahulu inya sawat bakakarasan lawan supir taksi dibawa bakuliling lalu ungkusnya ditagih dua kali lipat padahal jalannya kada jauh pada alamat nang ditujunya.

Sakalinya si supir bujur haja kada mangaramputi karna jaraknya bajauh sabab jalannya hanya saarah haja. Kaya itu jua Palui biasa manumpang taksi kuta sarik lawan supir karna jaraknya parak haja lalu ditagih sama lawan nang jauh.

Sakalinya ungkus bulang bulik Palui jadi dua kali lipat jua padahal mulanya inya handak mangalahakan supir mandangar jawaban jauh dekat sama haja. Sakalinya inya nang tapakalah. Tapi biar Palui rancak ka Banjar atawa ka Jawa inya balum tahu wadah makanan nang nyaman lawan nang murah.

Wayah inya ka Banjar lawan Garbus dibawainya makan di rumah makan minang lalu Palui bausaha mahabisakan apa nang dihidangakan.

“Lui.....ingat-ingat Lui. Amun dihabisakan ikam cagar mati kakanyangan lawan aku cagar lucut mambayarnya” ujar Garbus.

“Sayang kaina tabuang-buang kalu kada dihabisakan” sahut Palui takulum-kulum muntungnnya.

“Nang kita bayar adalah nang kita makan haja jadi amun dihabisakan katuju banar bubuhan tukang warung” ujar Garbus.

Tweet

Artikel keren lainnya: