Salah Pasang

Salah Pasang

hari semalam ongol disuruh haji untat menajakan bendera warna biru tuha sebukuan disepanjang jalan kampung liur.
karena dapat gawian pastiam ada upahnya gasan inya wan kekewalannya.
“ada ja kalo upahnya kena ji,” takon ongol.
“mun kada diupah pasti buhan ikam kedida nang hakonnya.
makanya pasang dulu kena hanyar aku upah,” sahut sidin.
“bila masangnya ji,” takon ongol pina penasaran banaran.
“malam kena,” sahut sidin.

handap kisah, parak jam 10-an malam ongol cagaran handak memasang bendera nang disuruh haji untat tadi siang.
lalu inya ne mendatangi kekawalannya.
tok tok tooook.
“ada urangnyakah didalam neh,” ujar ongol mengetok lawang rumah pun anang gabau.
“ui urangnya,” ujar ongol pina penasaran banaran.
kada berapa menit keluar am anang gabau wan tapih diawak.
“kemalaman ngolai, aku kada jadi umpat paan,” ujar anang gabau.
“nah iya am, cagaran aku wan nang lainnya ja neh memasangnya mun kaya itu wal ai,” sahut ongol.
“ayuja gawi ngolai aku ngantuk nah,” ujar anang gabau sambil menutup lawang.

sekalinya kekawalan ongol nang lainnya gin bepadah kada kawa jua karena memasang bendera kemalaman.
“kemalaman ngolai, ikam ja gin lah,” ujar dangdut.
kaya itu jua utuh lengkor wan utuh kalubut sama-sama kada hakonnya memasang bendera karena memang kemalaman.
maklum jam 10 malam apalagi isuk begawi lagi memantat pekat.

akhirnya ongol sorangan nang memasang bendera warna biru sebukuan disepanjang jalan kampung liur.
tepaluh-paluh ongol memasangnya maklum tihang benderannya dari kayu pohon halaban.
“telanjur me hi-ih kan ja pang semalam neh.
jaka tahu kada hakon jua ai nah,” garunum ongol.
“tapi kada papa ja nang penting sudah tuntung memasangnya,” ujar ongol sedikit himung.

keisukan harinya haji untat keliling kampung liur melihat hasil gawian ongol tadi malam nang disuruh sidin memasang bendera partai warna biru.
baya sampai di pertengahan jalan harau tekajut sidin neh.
“astaghfirullah, ne bendera kematian dipasang ongol.
kenapa bisa dipasang disini neh.
menyupani ja,” ujar sidin pina habang muha.

kada berapa menit langsung am sidin mendatangi rumah ongol nang kada jauh dari tikungan simpang tiga sebelah selatan.
“ngoool, kenapa ikam memasang bendera kematian neh,” kuriak sidin.
mendangar haji untat kuriak-kuriak harau takelipik ongol ne tumatan atas ranjang.
“nah iya am, ada masalah ganal neh sampai-sampai sesepuh kampung liur datang kerumah aku,” garunum ongol sambil membukakan lawang.

mandam haji untat melihati muha ongol.
“ikam salah pasang ngolai, bendera nang ikam pasang tu bendera kematian nang biasa urang tajak dihadapan rumah  pas ada urang kematian,” ujar sidin.
harau masam muha ongol pas mendangar penjelasan sidin.
“inggih ji, kena ulun ganti wan nang lainnya,” sahut ongol.
“dasar haji untat, nang disalahkan aku ne am padahal sidin jua nang semalam meunjuki bendera.
mana aku tahu ah wan bendera mana bendera kematian mun semuanya ada 150 buting.
dasar haji untat,” ujar ongol menggarum didalam hatinya sorang saking sangkalnya wan sidin.
(*/fin)
 



sumber: radarsampit[dot]net

Tweet

Artikel keren lainnya: