Jadi Pangawahan

Jadi Pangawahan

tiap urang itu pasti ada kalabihan dan kakurangannya.
tapi kabanyakan urang pasti banyak kurangnya daripada labihnya.
makanya ada istilah kukurangan alias kada ganap.
disamping ada istilah kukurangan ada jua istilah balabihan alias sama-sama kada ganap jua.
baiknya kakurangan wan kalabihan itu saimbang.
“kalabihan ikam itu mak ai adalah kada lain awak ikam nang balabihan timbangannya, makanya tamasuk manusia kada nurmal,” ujar garbus mahapak tulamak.
“hidup itu nang panting sihat, lamak atawa kurus itu sudah pambawaan matan sananya,” sahut tulamak.
“kalu kaya itu, cuba tangguh apakah kakurangan dan kalabihan kawal kita si palui ini?” ujar garbus sambil manunjuk palui nang hanyar datang.
“kalu kulihat muha wan tangan palui hirang bacalumut harang, kalabihan palui pastilah kaharatannya mangawah nasi,” ujar tulamak.
“bujurkah lui?” ujar garbus.
“sabujurnya kada kaharatanku mangawah nasi, tapi karna kadada nang lainnya maka akulah nang tapakai,” ujar palui.
“tapi kulihat satiap ikam mangawah nasi di urang aruh bakakawinan atawa basalamatan maka kawahan ikam nasinya pasti hangit banyak karaknya,” ujar garbus.
“mangawah nasi ini tamasuk cara mamasak urang bahari, karna harus ada tungku, harus ada kawahnya, ada pangayuhnya gasan maharu.
karna kawahnya wasi ganal dan kandal maka apinya harus nyarak.
karna api nyarak itulah maka banyak karaknya,” ujar palui.
“ikam katuju nang bakarak atawa nang kada bakarak,” ujar tulamak manakuni garbus.
“aku katuju nang kada bakarak,” ujar garbus.
“kalu aku sudah pasti katuju nang bakarak, makanya kuusahakan supaya karaknya kandal dan tabal supaya nasinya babau harum,” ujar palui lihum.
“kalu nasi kawahan banyak karaknya maka pasti bakurang nasi putihnya,” ujar garbus.
“sabujurnya banyak karaknya itu supaya kawa dibarakat dibawa bulik,” ujar palui.
“ooo .
.
.
jadi karak itu gasan dibawa bulik, gasan dibarkatkah lui?” ujar tulamak ma-anyaki.
“hiih, kubawa bulik, kubarakat lalu kujamur.
kawa dimakan tahan saminggu atawa satangah bulan,” ujar palui mangaku.
“kaya apa caranya maka tahan samingguan?” ujar garbus.
“karak nang dijamur tadi jadi karing dan karas, bila handak dimakan dirandam ka banyu supaya lamah jadi nasi.
malaran bahimat kada manukar baras samingguan,” ujar palui tatawa.
“dasar palui banyak akalnya, satiap ada urang ba-aruhan pasti jadi pangawahan karna ada untingannya,” ujar tulamak paham kalabihan palui.
(emhati/rep)




googletag.
cmd.
push(function() { googletag.
display('div-banjarmasin-article-bottom-signature'); });
)
Source from: banjarmasin[dot]tribunews[dot]com

Tweet

Artikel keren lainnya: