Bulat Jua

Bulat Jua

matan bahari palui wan kawanannya katuju banar manuntun urang main bal.
amun sudah ada main bal di tipi pasti bubuhan palui kada katinggalan.
dalas bagadang inya manunggui.
“ada bal kah malam ini lui?” ujar tulamak wan garbus nang hanyar datang.
“ada ai, tapi nang liga kita haja,” ujar palui manyahuti.
“bah, aku kada tapi katuju.
aku kaciwa lawan pasipakbolaan kita, tamasuk panuntunnnya nang katuju bakalahi,” ujar garbus.
“bujur bus ai, aku sapandapat lawan ikam.
kaya apa handak maju amun sakalinya main bal diulah main tinju,” ujar tulamak maakuri panderan garbus.
“tapi kada sabarataan kalu kaya itu? ada haja kalu nang baik,” ujar palui malawanakan.
imbah itu kasana kamari bubuhannya bapander main bal.
amun sudah kaya itu kada ingat burit wan kapala lagi.
palui nang paharatnya pander.
matan kisah main bal di kampung dibawa-bawanya sampai bubuhan david beckham umpat jua dipanderakan.
palui harat jua mambumbui kisahnya, makanya buhannya katuju mandangar panderan palui.
“bubuhan ikam tahulah kanapa main bal tu sababaknya 45 manit?” ujar palui mambari partanyaan.
“itu paraturan matan dunia sana lui ai,” ujar tulamak manyahuti.
“amun 5 jam bisa bamatian lui ai,” ujar garbus umpat manjawab.
“jawaban tulamak masuk akal, tapi balum bujur.
jawaban garbus itu jawaban bakakajalan,” ujar palui.
“jadi samuaan salah.
“nang bujur jawabannya napa?” ujar tulamak handak tahu.
“jawabannya jawaban matematika wan kada jauh pada nang bulat-bulat kaya bal,” ujar palui.
“napa hubungannya lawan matimatika? ujar garbus panasaran.
“jumlah pamain bal itu 11 kalu? kaliakan 2 jumlah pamain baratan, barapa?” ujar palui.
“22 jumlahnya,” ujar tulamak wan garbus taimbai manjawab.
“22 dikaliakan lawan 2 bigi ampun burung masing-masing pamainnya, karena inya bulat jua jadi jumlahnya 44 kalu.
limbah itu tambahakan 1 bal nang diparabutakan pamain tadi maka jumlahnya jadi 45 kalu?” ujar palui mangalakak tatawa.
“kanapa 2 bigi bal ampun kita dihitung jua lui?” ujar tulamak kada tarima.
“inya bulat jua kaya bal,” ujar palui kada hakun kalah.
“jawabannya bapaksaan jua sakalinya,” ujar tulamak wan garbus kakalahan.
(fai/rep)


terkait    #palui

baca juga



pakulih bini






editor: sudi

sumber: banjarmasin post edisi cetak






tweet
)
Source from: banjarmasin[dot]tribunews[dot]com

Tweet

Artikel keren lainnya: