Tanda Pengenal

Tanda Pengenal

hari semalam ongol penambaian masuk begawi dikantor sesepuh kampung liur sebagai tenaga honor.
inya ne telihat bingung melihat ada nang bengatung dikantong baju kekawalannya.
lalu ai inya betakon.
“apa nang begantung ne ah,” takon ongol.
“ini ngarannya tanda pengenal ngol ai.
supaya urang tu kada banyak betakon lagi am,” sahut utuh lengkor.
“kenapa aku kedida wal,” sahut ongol.
“aku gin baulah sorang ngol ai.
jangan harap paan diulahkan urang,” ujar utuh lengkor.

tuntung begawi ongol ne langsung am mendatangi anang gabau mengisahkan cara meulah tanda pengenal nang dilihatnya tadi dikantor.
“ikam kawakah meulahkan tanda pengenal gasan aku,” takon ongol.
“gampang ja ngol ai.
asal sesuai wan upahnya ja,” sahut anang gabau.
“berapa am harganya tu eh.
ayoam,” takon ongol pina penasaran banar.
“kada larang pang.
seselop roko cap pekat ja harganya toeh.
hahahaha,” ujar anang gabau.
“berarti seratus ribuanlah,” ujar ongol.
“sip ngol ai,” sahut anang gabau sambil meambil duit nang diunjuk ongol tadi.

handap kisah, semingguan ongol mehadangi tanda pengenal nang dipesannya wan anang gabau.
pas hari minggu tu am pesannya tuntung digawi.
“ikam dimana ngol.
tanda pengenal ikam tuntung am neh,” takon anang gabau rahatan menelpon ongol.
“aku dijembatan wadah biasa kita badudukan wal ai.
antar kesinilah, aku tunggu nah,” sahut ongol sambil takurihing, maklum inya neh handak menampaikan wan kekawalannya nang ada dijembatan.

kada berapa menit datang am anang gabau membawakan tanda pengenal.
belum sampat memarkir sepeda ontel sudah didatangi ongol am.
pinanya kada sabar banaran inya neh.
“mananya wal tanda pengenal aku pesan semalam wan ikam,” takon ongol.
“astagaaaa, sabar  ja ngol.
duduk disana ja ikam,” sahut anang gabau sambil mengeluarkan sesuatu nang ada didalam tasnya.

melihat anang gabau lagi mengeluarkan sesuatu langsung ai ongol menangkapnya.
“asiiiiik, tanda pengenal aku tuntung.
terimakasih waaaaal,” ujar ongol pina kehimungan sorangan.
“mananya ngol.
aku handak melihat foto ikam nang ada di tanda pengenal tu,” ujar dangdut.
“gagah wal ai, hahahaha,” sahut ongol pina musti banaran.

tuntung ketawa lalu ongol melihatkan tanda pengenal nang diulahkan anang gabau tadi.
pas rahatan dilihatkannya, harau mengangkang dangdut wan amang bular.
“hua hahahahaha, gambar ikam tuha banar ngol ai.
basesengot pulang,” ujar dangdut pina ketawa kada meingat diri.
“wakakakak, ne gambar haji untat, kenapa dipasang ditanda pengenal.
ngarannya  ongol tapi gambarnya sesepuh kampung liur,” ujar amang bular umpat jua menyambati.

apada, habang muha ongol pas disambati bebuhannya.
merasa penasaran melihat sorang ai inya neh wan tanda pengenal nang diulahkan anang gabau.
“huaaaaaa, anang gabau tesalah meandak gambaaar.
itu haji untat wal ai.
lainan gambar aku paaaan,” ujar ongol tenganga.
harau masam jua ai muha anang gabau pas melihat gambar ditanda pengenal pun ongol tadi.
“astagaaaa, tesalah pasang ngol ai.
aku kira semalam bujur ja.
maklum pang, semalam mati lampu seharian jadi kada kawa lagi am membaikinya,” ujar anang gabau.

akhirnya, tanda pengenal si ongol tadi terpaksa diulahkan lagi oleh anang gabau.
“karena sudah dicetak, paksa tambah lagi duitnya,” ujar anang gabau.
mendangar pander gabau ne tadi, kada berapa menit tukaham ongol.
maklum, duit nang diunjuknya gasan meulah tanda pengenal semalam tu duit bahutang jua wan haji untat.
(fin)
 



sumber: radarsampit[dot]net

Tweet

Artikel keren lainnya: