Tunggal Bigian

Tunggal Bigian

palui sadar haja inya kada tapi lancar mangaji, makanya inya kada hakun anaknya taumpat pambabal kaya inya.
makanya tampulu tapaimbai wan anak garbus wan anak si tulamak, inya baniat maumpatakan anaknya itu mangaji jua di wadah julak ijul.
pamulaan ngalih jua mambujuk anaknya itu umpat mangaji, tapi imbah malihat ada imbaian yaitu anak garbus wan anak si tulamak, akhirnya inya hakun jua.
"kaina kalu ikam mangajinya lancar, abah tukarakan sapida," ujar palui manjanji-i.
parak sabulan sudah kakanakan mangaji, makanya palui handak tahu kaya apa kamajuan anaknya itu.
imbah sambahyang magrib lalu dikiyaunya anaknya itu.
"ayu pang nak, abah handak mandangar ikam mangaji.
ada juakah kamajuan," ujar palui manyuruh anaknya itu mangaji.
"sampai mana ikam nak?" ujar bini palui umpat manakuni.
"iqra 2 ma ai," sahut nang anak.
"umai lah, sabulan mangaji hanyar iqra 2 haja lah?" ujar palui takakajut handak manyarik.
"hadangi dahulu abahnya ai, jangan disariki dahulu, dangari dahulu inya mambaca," ujar nang bini malawanakan.
lalu anak palui mambaca iqra 2.
pina masih bajuju inya mambacanya.
"mambaca tu tunggal bigian haja, jangan kaya itu," ujar palui sarik mandangar anaknya kada lancar mambaca.
"ayu nak, baca tunggal bigian, kaena abah ikam sarik lagi," ujar nang mama manggamati.
"bigi salak, bigi nangka, bigi rambutan lawan bigi durian, bigi tiwadak, bigi.
.
.
bigi.
.
.
.
nang lain ulun kada ingat lagi nah," ujar nang anak bahimat manyambati bigi-bigian nang dingatnya.
"dasar kada lain pada abah ikam.
.
.
sama pambabalnya! kanapa sagala bigi nangka ikam sambati?!" ujar bini palui mahahing.
"bubuhan pian tadi manyuruh ulun manyambati tunggal bigian, jadi ulun sambatai sagala bigi nang ulun tahu, nangkaya bigi nangka lawan bigi salak," ujar nang anak kada hakun disalahakan.
"tuturunan kuitan laki," ujar bini palui manggarunum kasarikan.
(bpost/fai)


Source from: banjarmasin[dot]tribunews[dot]com

Tweet

Artikel keren lainnya: