Sudah Diludahi

Sudah Diludahi

palui wan kakawalannya garbus, tulamak umpat bagawi di pambangunan parumahan.
karena bangunan rumahnya banyak, bubuhannya tapaksa umpat guring bamalam di gudang pamburung.
sudah kabiasaan bila pambangunan banyak, pasti ada urang nang mambuka warung.
makanya, sual makan nginum kada parlu bamasak saurang karna warung itu hakun haja mahutangi wan bayar tiap hari sabtu sahabis gajian saminggu sakali.
"tarus tarang haja tiap baisukan aku kada biasa makan nasi bus ai," ujar palui.
"padahal, kulihat ikam tahan banar sampai tangah hari kada lapar-lapar, lalu wan napa maisi parut lui?" ujar garbus.
"bahanu kuisi wan lapat atawa katupat, bila lapat kadada maka kuisi wan gumbili kayu atawa gumbili layap," ujar palui.
"sama haja lui ai, dua bigi lapat atawa sagumpal gumbili sama kanyangnya wan sapiring nasi," ujar garbus mananatawakan.
"tapi nang manguati parutku sampai tangah hari itu bus ai, tiap baisukan aku pasti mamasan kupi sacangkir ganal," ujar palui sambil manunjuk cangkirnya nang baandak di higa lawang.
malihat palui manunjuk kupi cangkir ganal, tulamak nang mulai tadi mandangarakan panderan palui wan garbus, lalu baucap: "itu lain cangkir ganal lui ai, tapi itu rantang," ujar tulamak sambil lihum karna inya sudah rancak umpat manginum bila palui kadada.
sabujurnya palui sudah curiga jua bahwa kupinya dalam cangkir itu ada nang umpat manginum, karna hanyar dihirup talu taguk sudah batangah cangkir puangnya.
karna kakarancakan dinginum urang maka palui muyak jua, lalu diakalinya.
imbah kupi itu dinginumnya ampat lima taguk, lalu di atasnya diandakinya kartas batulisan 'harap jangan dinginum karna sudah kuludahi.
' palui yakin haja bahwa pasti kupinya aman wan kakawanannya pasti kada wani manginum karna sudah diludahinya.
"aman, pasti aman.
kada mungkin bubuhannya hakun manginum kupi nang sudah kuludahi," ujar palui wayah istirahat handak nginum tangah hari.
eee .
.
.
sakalinya palui takajut banar karna wayah inya mambuka tutup cangkir handak nginum, dihiga cangkir itu dilihatnya ada kartas batulisan 'sabaiknya jangan dinginum karna kami umpat jua maludahi.
'"manyumpah palui, padahal aku hanya handak manakutani haja maka pura-pura kuludahi, sakalinya bubuhannya bujur-bujar maludahi," ujar palui gagarunum kasasarikan kada jadi nginum tapi kada wani jua manuduh kakawalannya karna takutan kalu pina dikaruyuk bubuhannya.
emhati(repro)


Source from: banjarmasin[dot]tribunews[dot]com

Tweet

Artikel keren lainnya: