Sakahandak Mambawa

satiap hari ahad atawa hari parai, bubuhan palui, garbus wan tulamak katuju banar bajajalanan ka banjar, tamasuk bila kamariannya bubuhannya pasti ka pasar tungging.
sampai-sampai bubuhan padagang di sana patuhan wan bubuhan palui itu.
"aku katuju ka pasar tungging ni karna kita kawa sakahandak mambawa," ujar palui wayah bakuliling balalihat.
"sakahandak mambawa napa lui, gratis kah?" ujar tulamak batakun "satahuku di pasar tungging kadada bakurting-kurting kaya di tuku ganal," ujar garbus.
"di sini kawa batawaran haja.
" "buktiakan ja panderanku, amun disini kita kawa sakahandak mambawa, handak nang mana ikam, bawa haja," ujar palui pulang.
"ikam haja buktiakan lui ai.
aku takutan, kalu disangka urang maling," ujar tulamak "lihati urang tu nah, sakahandak kalu mambawa barang tukarannya?" ujar palui manunjuk ka binian nang mungkal.
"hi-ih lah, pina sing juhut haja," ujar garbus.
"asa handak jua aku nah," "aku masih balum yakin bus ai," ujar tulamak.
"baiknya aku takunakan sorang lawan panjual nya dulu lah.
" takunakan ja," ujar palui manahapi.
"bujur kalu cil, batatukar di sini sakahandak mambawa?" ujarnya manakuni nang bajual baju.
"bujur banar, pilih haja dahulu," ujar acil tu manyuruh bubuhannya mamilih.
"nah katuju banar aku kaya ini, dapat nang parai babilanja.
kita kawa sakahandak mambawa bulik," ujar tulamak.
"aku handak mambawakan bini ku jua nah," ujar garbus mamilih ka kutang.
"tarima kasih cil lah, pian baik banar nah.
mudahan pian masuk surga," ujar tulamak wan garbus handak balalu.
"kaina dahulu, kaina dulu.
bulikan, bayari dahulu nak ai," ujar acil tadi.
"maka ujar sakahandak mambawa, kanapa maka disuruh babayar?" ujar garbus malapas ka baju wan kutang nang dipilihnya.
"ikam ni kayapa lui, mamadahi kami," ujarnya sarik.
"bubuhan ikam jangan manyalahakan aku.
aku tadi bapadah sakahandak mambawa tapi kada baarti parai," ujar palui bajauh.
"bubuhan ikam ni lawas bakawal palui, kada paham jua maksudnya," ujar acil tatawa.
"ayu bayari nang dipilih tadi," ujar acil manggasak.
"amun kaya itu sabuting ja ulun mambil, kada jadi babanyak amun bayar jua," ujar tulamak.
"kada jadi jua am aku manukarakan kutang bini," ujar garbus kakalahan.
"kamahiran handak parai tarus pang," ujar palui mangalakak tatawa.
(bpt/fai)

Source from: banjarmasin[dot]tribunews[dot]com

Saturday, March 30, 2013