Mangidam Rimpi

Mangidam Rimpi

rupanya kada tagantung musim, apakah musim hujan atawa musim karing, parut bini palui gambung pulang. bila dihitung-hitung bilang basambung tarus satiap tahun. babaya ganal sadikit lalu mahalusi pulang.“sakali ini biniku mangidam ngalih banar mangabulakan kahandaknya,” ujar palui bakisah wan kakawalannya.“handak marasani napa lui?” ujar garbus.“inya handak banar mamakan pisang,” ujar palui.“pisang napa lui? apakah pisang bujuran atawa nang saukuran pisang?” ujar garbus manggayai.“pisang itu macam-macam ukurannya lui ai. apakah pisang mahuli nang kacil mungil tapi lamak atawa pisang paikat nang pina malilit atau pisang ambon nang ganal wan panjang-panjangnya?” ujar tulamak umpat mahuhulut.“bubuhan ikam ini pasti ma-artiakan pisang lain. kalu pisang lain itu ampunku sudah luar biasa, umanya sudah kada kamakanan,” ujar palui manangkis.“lalu pisang napa nang dikahandakinya lui?” ujar garbus.“biniku itu mangidam handak pisang masak di sampaian dapur,” ujar palui.“kadada pisang masak di sampaian dapur. pisang mustinya masak di puhunnya lalu ditabang atawa bisa jua masak diparam karna masih mangkal,” ujar tulamak.“samunyaan sudah kucuba, masak di puhunnya, masak digantung atawa masak diparam itu kadada nang cucuknya,” ujar palui.“napa ngaran pisangnya dan kaya apa balangnya?” ujar tulamak.“nang dikahandakinya adalah pisang awa babigi, balangnya cuklat-cuklat hirang wan pisangnya pina takarusut,” ujar palui.“kalu takarusut ba-arti bahalus lui ai. kalu bahalus kada nyaman,” ujar tulamak. tuhuk kakawalannya umpat mamikirakan pisang napa nang dikahandaki bini palui.“ooo... aku paham. bini ikam itu pasti mangidam rimpi pisang nang dikaringakan di atas sampaian dapur, masaknya pisang itu karna panas api dapur dan bantuknya takarusut,” ujar garbus bakakajutan baluncat.“hi’ih-lah sakalinya rimpi, aku sama sakali kada ingat ngarannya bus ai” ujar palui manyalami kakawalannya itu, lalu parmisi bulik handak manukarakan wadai rimpi. (ivd/mht)


Sumber: tribunews[dot]com

Tweet

Artikel keren lainnya: