Digawi Juragan Kapal

Digawi Juragan Kapal

sudah lawas palui wan kakawalannya handak marasai bakapalan ka hulu sungai.
sualnya amun pakai mutur, sudah rancak atawa bilang kada kahitungan.
tagal bubuhannya kada biasa babuat ka kapal manuju ka hulu sungai.
isuknya, tulamak didangani si garbus tulak mancari kapal jurusan banjar-negara.
di palabuhan bim wadah kapal nang tujuan hulu sungai nang badua tadi mancari impormasi lawan sakalian batatawar.
"jadi jua kita tulakan.
kapalnya ganal jadi kawa kita buati banyak-banyak urangnya.
lawan kapalnya laju, jadi kita kira-kira ampat jam tambus ka nagara.
tulaknya limbah tangah malam jadi sampai di nagara sungsung haja kawa ka pasaran balilihat, batutukar di wadah karajinan.
siangnya balarut pulang kita, jadi minggu sore sudah sampai pulang ka banjar," tulamak basamangat malaporakan apa nang diimpormasiakan ulih juragan kapal.
juragan tadi sudah maakuri ungkus tambangnya.
hari sabtu nang dirancanaakan, bubuhannya jadi tulakan.
rami lawan himung bubuhannya baricau di kapal.
garbus maudak super mi lawan maulah kupi gasan bubuhannya.
asyik baricau lawan bamamakan, bubuhannya kauyuhan.
kada tarasa taguringan barataan.
asa lawas guringan, dasar lawas jua-ai bubuhannya mangaruh kira-kira sudah lima jam matan waktu tulakan tadi.
di hadapan kalihatan ada kampung, bubuhannya mangira parak sampai, tagal limbah batakun lawan juragan kapal, dipadahakan balum lagi sampai ka nagara.
"itu marabahan, pak-ai.
nagara masih ka hulu lagi," ujar juragan pina biasa-biasa haja.
karinyuman bubuhan palui mandangar pander juragan kapal.
garbus kada tahan lagi lalu batakun: "kapal ngini lajukah juragan?""laju jua nang kaya biasanya," juragan kapal manjawab.
bubuhannya sudah mulai marasa kalawasan di kapal, tagal balum jua sampai.
palui sudah dua talu kali batakun lawan juragan barapa jam lagi, salalu dijawab ulih juragan sajam lagi.
jam dua tangah hari hanyar kapal marapat di darmaga nagara.
jadi mun dihitung mulai tulakan tadi maka banjar - nagara dua walas jam alias saharian.
di nagara, pasar sudah ampihan, kadada sumangat lagi bubuhan bajalanan, apa mun kalawasan di kapal lawan datang sudah limpat tangah hari maka harinya panas banar.
tapaksa-ai bubuhannya naik ka warung katupat kandangan, asing-asingnya mahantup katupat.
kada lawas limbah makanan, bubuhannya bapikir handak tulakan bulik ka banjar, supaya kada kamalaman di jalan.
bulikannya bubuhannya kada lagi bakapal nang kaya rancana, tapi bamutur.
"rupanya kita digawi ulih juragan.
sualnya mun dipadahakan dua walas jam, kita pasti kada hakun bakapal," ujar palui gagarunum.
"jaka ba-kelimutu, kita sudah sampai di bawean, parak lagi ka jawa," ujar garbus sambil tatawa.
bubuhan palui nang ada di mutur tatawaan.
(rep/sug)


Source from: banjarmasin[dot]tribunews[dot]com

Tweet

Artikel keren lainnya: