HARI semalam Haji Untat mengiyau Ongol ada nang diminta sidin betetukar di pasar Kampung Liur. Karena mendapatkan perintah dari sesepuh kampung lalu ai Ongol menurunkan sepeda ontelnya yang keluaran tahun 40-an. “Mantab ikam neh Ngol ai. Memang anak buah nang kawa diandalkan,” takon Haji Untat. “Nukar apa ah Ji,” sahut Ongol. “Tukarkan CD lah, nukarkan 3 buting,” ujar sidin. “Okey Ji,” sahut Ongol sambil meambil duit nang diunjuk sidin tadi.
Wan sepeda ontelnya Ongol tulak ke Kampung Liur, dalam perjalanan bedapat Anang Gabau wan Dangdut nang lagi bedudukan di jembatan. “Handak kemana ikam Ngol,” takon Anang Gabau. “Ke pasar wal ai, disuruh Haji Untat menukar CD,” sahut Ongol. “Ya kah, jangan tesalah tukarlah. Bebaik tetukar nang lain, hehehe,” ujar Anang Gabau. “Tenang ja, dijamin deh,” sahut Ongol pina musti banar wan muha.
Handap kisah, kipuhnya jua pang Ongol mencarikan pesanan Haji Untat karena nang bajual di pasar wayah ne kada tapi ada lagi am. “Dimana am mencarinya neh. Sadang sudah keliling sana sini,” garunum Ongol. Rahatan bingung inya neh bedapat wan Amang Bular. “Caria pa Ngol,” takon sidin. “Mencari CD gasan sesepuh kampung ne pang nah. Sadang sudah kesana kesini kada bedapat jua nah,” sahut Ongol. “Coba ikam cari dihujung sana Ngol, disana ja ada nang bajual. Mun ikam mencarinya dipasar iwak memang kedida paan urang bajual CD tu eh,” ujar Amang Bular. Mendangar pander sidin tadi, harau birai muha Ongol. “Yakah,” sahut Ongol.
Lalu Ongol mendatangi urang bajual CD nang ditunjuk Amang Bular tadi, sekalinya memang ada dibuncu sana. “Dasar jua, sekalinya dibuncu sini nang bajualan. Pantas ai disana tadi kedida paan,” garunum Ongol. “Nukar CD kah,” takon penjual CD. “Nukar tiga buting, lagu dangdut, keroncong wan rock N roll,” ujar Ongol pina musti banaran. “Lima belas ribu ja wal ai tiga buting neh,” ujar penjualnya. “Bungkuuuuss,” sahut Ongol. “Asiik, banyak labihannya, hehehe,” ujar Ongol dalam hatinya cagaran dapat angsulan banyak.
Tuntung menukar CD lalu inya behancap bulik menuju rumah Haji Untat, dalam perjalan lewat jembatan bedapat pulang wan bebuhannya. “Dapatlah Ngol,” takon Anang Gabau. “Dapat ai, bajual CD nya dihujung pasar sanaaaaa,” ujar Ongol mengisahkan sambil wan tunjuk-tunjuknya tu am. “Hua hahaha, mun ikam mencarinya tadi di pasar iwak kalo,” ujar Anang Gabau. “Darimana ikam tahu,” takon Ongol. “Amang Bular bepadah tadi, ikam mencari CD dipasar iwak jar sidin,” sahut Anang Gabau.
Merasa kada nyaman aur disambati lalu Ongol behancap meninjak sepeda ontelnya menuju kerumah Haji Untat. “Assalamu ‘alaikum,” ujar Ongol mengucapkan salam. “Wa’alaikum salam. Dapatlah Ngol. Ukurannya nang ganal lah karena bisa kada muat wan burit aku. Aku neh belamak eh,” ujar Haji Untat. Mendangar pander sidin tadi, bingung ai Ongol neh. “Maksud pian apa Ji,” takon Ongol. “Aku tadi menyuruh ikam nukar CD alias Celana Dalam alias selawar sempak atau cawat. Sudah ikam tukarkanlah,” ujar sidin.
Apada, mandam ai Ongol pas mendangar pander sidin tadi. “Inggih Ji ai, tadi sudah ulun tukarkan CD. Tapi, CD lagu dangdut, keroncong wan rock N roll,” sahut Ongol. Apada, habang ai muha sidin pas mendangar pander si Ongol tadi. “Itu Compact Disk Ngol ai, ne lainan CD nya. Wadooooohhh,” ujar sidin geleng-geleng kepala. Sekalinya Ongol ne kada paham wan pander sidin. Tesalah inya neh kada betaken jua apa itu CD. Sekalinya Celana Dalam alias selawar sempak atau cawat. Malahan inya tukarkan CD lagu. “Maaflah Ji, kena ulun bulik an,” ujar Ongol pina supan sorangan. (fin)
Sumber : radarsampit.net
Belum ada tanggapan untuk "Tesalah Pesan"
Post a Comment
Note: Only a member of this blog may post a comment.