Sore nang cerah bebuhan Ongol dudukan di jembatan ada nang baroko wan ada nang bakisahan maklum, dijembatan itu am bebuhan Kampung Liur bakumpulan karena lebih baik santai dijembatan daripada di warung mengurangi pengeluaran. “Apa nang minum ikam tu Ngol,” takon Anang Gabau. “Pas aku dirumah tadi ada minuman neh diatas meja. Kedida nang meminumnya paksa ai bawa ke sini,” sahut Ongol. “Oooh, aku kira tadi menukar di warung Acil Jablay tadi,” ujar Anang Gabau. “Nah kada tahu am, masalahnya aku tahu minum ja, hehehe,” sahut Ongol.
Minuman yang diminum Ongol tadi hitungan menit ja habis diminumnya apalagi sore nang cerah to membuat kerongkongan inya karing jadi harap maklum mun hitungan menit habis diminumnya. “Akui lajunya Ngol, kada betahap-tahap lagi am meminumnya,” tagur Dangdut. “Bukannya kada handak membari pang wal ai, maklum ja haus eh, hehehehe,” sahut Ongol. “Yakah, Cuma bagemet-gemet pang meisapnya toeh. Ne pina behancap banar nangkaya kekawalan handak minta,” ujar Dangdut. “Kada nangkaya itu pang wal ai, haus bore ai, maok neh,” sahut Ongol sambil membuang gelasnya.
Handap kisah, tumatan jauh ada nang datang naik sepeda ontel sambil baroko cap pekat. “Tu be Haji Untat. Handak badudukan jua kalo sidin di jembatan neh,” ujar Anang Gabau. “Bagus jua wal ai, daripada sidin taungut dirumah mendingan bedudukan. Ya kaloooo,” sahut Ongol. “Kada biasanya sidin sore-sore bejalanan. Biasanya dikebun gatah am sidin toeh,” ujar Utuh Lengkor. “Kada mesti jua walai, buktinya sidin kemari kalo,” sahut Dangdut.
Rupanya kedatangan Haji Untat ke jembatan to memang ada nang handak dikisahkan sidin. “Isuk Minggu kita gotong royong lah, bawa parang, sapu, cangkul wan garuk,” ujar sidin. “Siap Ji, tapi ada ja kalo makanan wan minumannya gasan nang begawi neh lah, hehehe,” sahut Ongol pina musti banar wan pander. “Tenang ja Ngol, sudah ada dananya toeh. Pokoknya pisang goreng wan tahu goreng siap gasan isuk. Tapi, gasan nang begawi ja nang aur berokoan. Sori deeeeh,” sahut Haji Untat.
Rahatan bepanderan, kenapakah mata sidin tu melihat ada gelas bakas minuman nang diminum si Ongol tadi. “Hau, kenapa gelas minuman tu kada digosok atasnya. Itu ada hadiahnya, mun kada salah sepeda motor Ngol ai,” ujar sidin sambil menunjuk kearah gelas minuman nang dibuang Ongol tadi. Mendangar pander sidin tadi, harau behancap berabut ai bebuhannya meambil gelas minuman bekas diminum si Ongol tadi.
Bebuhannya saling juhung merabutkan gelas minuman, ada nang sampai tekantut-kantut maklum merabuti gelas nang halus. “Horeeee, aku nang dapatnya,” ujar Ongol pina kehimungan. “Jangan tapi kehimungan Ngol ai, hancap ai digosok tulisannya toeh. Kita ne penasaran jua apa Gerang hadiahnya. Sampai-sampai kita berabut. Ne sandal japit aku nah sampai pagat gara-gara umpat berabut jua,” ujar Anang Gabau.
Lalu Ongol meambil duit logam gasan menggosok-gosokan gelas nang ada warna hirangnya. “Mudah-mudahan dapat sepeda motor. Mudahaaaan dapat, hehehe,” ujar Ongol pina semangat bebanaran menggosoknya. “Gancangi Ngol ai menggosoknya,” suruh Anang Gabau. “Santai ja wal ai, mun rezeki tu kada kemana paan,” sahut Ongol pina membuat bebuhannya sangkal bebanaran.
Kada berapa menit, gelas nang digosok si Ongol tadi wan duit logam sudah mulai am telihat tulisannya. Pas melihat hasilnya, harau mengangkang Anang Gabau. “Hua hahahahaha.. Anda belum beruntung,” ujar Anang Gabau. Sekalinya, tulisannya anda kurang baruntung. Apada, masam ai muha Ongol. “Wakakakak, dibongolinya. Kita maka tadi berabut behimat banaran sampai sandal japit pagat wan ada nang aku dengar tadi tekantut-kantut gara-gara merabuti gelas minuman berhadiah ja. Sekalinya, belum beruntung,” ujar Dangdut menambahi.
Sementara itu, Haji Untat tekurihing ja sorangan melihat kelakukan bebuhan Ongol nang pina nahap banaran menggosok tulisan nang ada ditutup gelas minuman nang diminum si Ongol. “Hahahaha, kena bongoli semuanyaaaaa,” kuriak sidin sambil mengujak sepeda ontelnya meninggalkan bebuhan Ongol. “Dasar Untaaaaatt,” balas Ongol karena sangkal kena bongoli sidin. (fin)
Sumber : radarsampit.net
Belum ada tanggapan untuk "Minuman Berhadiah"
Post a Comment
Note: Only a member of this blog may post a comment.