Pensil Kaca

HARI semalam Ongol dikiau Haji Untat ke rumah sidin meminta inya menukarkan pensil kaca. Rahatan muntung pina bakajal wadai lalu inya ne asal pander ja. “Tukarkan pensil inilah, nang semalam rusak,” ujar sidin sambil menunjuk kebawah. “Pensilkah Ji, tahu ai ulun,” sahut Ongol. “Jangan lawaslah, ditunggu neh,” ujar sidin pina ngalih bebanaran bepander maklum muntung masih bekajal wadai hambar.

Lalu sidin menjulungi duit 50 ribuan. “Harga pensilnya tu memang larang Ngol ai, sisanya bisa ja ikam ambil,” ujar sidin. “Iyalah, Ji, terimakasih ai. Hehehe,” sahut Ongol pina kehimungan banaran. “Lakasilah, pensilnya handak dipakai neh,” pesan sidin. Behancap ai Ongol menunggang sepeda ontelnya menuju pasar Kampung Liur.

Dalam perjalanan menuju pasar Kampung Liur, inya bedapat wan Anang Gabau nang lagi santai badudukan dijembatan. “Handak kemana Ngol,” tagur Dangdut. “Ke pasar wal ai, handak menukar pensil disuruh Haji Untat tadi,” sahut Ongol. “Akui, mencari pensil ja sampai ke pasar. di warung Acil Jablay gin ada ja bajual,” ujar Anang Gabau. “Sidin tadi maunjuk duit 50 ribu eh. Angsulannya gasan aku wal ai. Hahahaha,” sahut Ongol pina kehimungan banaran.

Handap kisah, imbah menukar pensil nang dipesan Haji Untat tadi Ongol ne kada langsung mendatangi sidin paan. Justru singgah pulang di jembatan. “Pesan sidin tadi, sisa duitnya gasan ikam ja. Jadi, sisanya ne banyak banar wal ai,” ujar Ongol. “Tukarkan roko cap pekat ja kawan neh. Itu gin mun hakon jua,” sahut Anang Gabau. “Mun hakon menukarnya kena aku unjuki duitnya,” ujar Ongol.

Akhirnya betiga ne barokoan di jembatan sampai handak kada ingat lagi am si Ongol ne wan janjinya. “Astagaaa, pensil pun Haji Untat wal ai. Aku kesana dulu lah,” ujar Ongol pina tekajut-kajut. “hi-ih kada papa ja, terimakasihlah roko sebungkusnya. Hahahaha,” sahut Anang Gabau. “Itu rezeki buhan ikam wal ai,” sahut Ongol sambil mengebut menuju kerumah Haji Untat.

Baya sampai dirumah, telihat Haji Untat lagi tesandar dikursi nang empuk. “Lawas banar Ngol, kemana ja ikam tadi,” takon sidin. “Anuah Ji, ngalih banar mencari pensil jar pian tadi tu. Untung diujung pasar tadi ada nang bajual, hehehe,” sahut Ongol. “Ikam tadi mencarinya dimana,” takon sidin pulang. “Diujung parak pasar iwak,” sahut Ongol.

Mendangar pander Ongol tadi, harau tekajut sidin. “Emangnya nang ikam tukar tadi tu pensil apa-an,” takon sidin pulang. “Pensil gasan menulis sesuai wan pesanan pian jua tadi,” sahut Ongol. “Bah iya am, tesalah tukar ikam tu Ngol ai. Nang aku kahandaki tu pensil gasan membelah kaca neh. Mananya pensil nang ikam tukar tadi,” ujar sidin.

Sambil menggatar tangan Ongol meunjuki pensil nang ditukarnya tadi. “Ini pensil kekanakan Ngol ai, kada kawa gasan memotong kaca neh. Iya am. Mana sisa duitnya tadi,” ujar sidin. Harau tepaluh dingin Ongol pas dimamai sidin. “Nah iya am Ji ai, angsulannya tadi sudah ulun tukarkan roko gasan Anang Gabau, Dangdut wan gasan ulun sorang,” sahut Ongol. Mendangar penjelasan si Ongol tadi, harau tujah Haji Untat. “Dasar si Ongol,” ujar sidin kada banyak bunyi lagi am. (fin)

 

Sumber : radarsampit.net

Tweet

Artikel keren lainnya: