Pina himung banaran Ongol ne imbah menukar hape hanyar di pasar, lalu menampaikan wan kekawalannya rahatan bedudukan di warung Acil Jablay. Warnanya gin unik, hirang putih mirik hintalu cacak. Setiap nang melihatnya pastiam tekurihing.
Merasa penasaran wan hape hanyar lalu ai ditakoni bebuhannya. “Berapa am harganya tu Ngol,” takon Anang Gabau. “Setengah jutaan walai,” sahut Ongol. “Beh, larang jua lah, aku kira tadi lima ratus dapat dua, hahahaha,” ujar Gabau pina beborean. “Emang wadai pilus nang lima ratusan, dasar jua ikam neh,” sahut Ongol.
“Biar larang Ngol ai, tapi tahan banyu jua pun ikam tu,” ujar Anang Gabau pina memanasi Ongol banaran. “Coba mun handak betanding wan pun aku neh, hakon ja aku. Biar buruk walai tapi tahan banting,” ujar Anang Gabau pina bebangat bebenaran memanasi. “Ikam tahulah, hape aku ne tahan banyu jua walai, siapa Gerang takutan berandam dibanyu. Oke,” sahut Ongol pina mantab banaran.
Handap kisah, lalu bedua ne behitung mulai satu, dua wan tiga. “Hitungan terakhir kita beimbai menculupnya kebanyu,” ujar Anang Gabau. “Okey, mun pun aku tahan banyu berarti ikam harus bayarlah,” sahut Ongol. “Bayar apa dulu,” takon Gabau. “Bayarkan hutang aku diwarung neh. Cuma selawi ribu ja. Wanikah kada,” gasak Ongol. “Wani banar, Cuma selawi ribu ja tuah, hehehe,” ujar Gabau pina tekurihing dihadapan Dangdut wan Utuh Lengkor.
Pas hitungan ketiga, lalu Ongol wan Anang Gabau mencelupkan hapenya masing-masing. “Jangan diangkat dulu, kita tunggu 5 menitan,” ujar Anang Gabau. “Oke,” sahut Ongol. Kemudian hitungan 5 menitpun sudah sampai. “Nah, sudah sampai 5 menit. Coba periksa hape siapa nang tahan banyu,” ujar Anang Gabau. Lalu Ongol memeriksa hape hanyarnya. “Bah iya pang, rusaaaaakkk,” kuriak Ongol.
Apada, mengangkang bebuhan Anang Gabau. “Nyata ai rusak hape pun ikam Ngolai, masalahnya nang betulisan tahan banyu di hape ikam tu apabila tempias banyu ja lalu tahan banyu inya eh. Ne lainan tempias banyu tapi dicelup kebanyu apada rusak ai. Apalagi nang ikam lawan neh hape nang sudah rusak jua. Biar dibantingkah atawa di celup kebanyu tetap ai tahan karena sudah rusak. Hahahaha,” ujar Anang Gabau. Mendangar penjelasan Gabau tadi, harau tujah Ongol. Mun dilawani sekalinya hape rusak pun sorang hape hanyar menukar. Mau kada mau ai mengumpul duit pulang menukar nang hanyar. (fin)
Sumber : radarsampit.net
Belum ada tanggapan untuk "Beharatan"
Post a Comment
Note: Only a member of this blog may post a comment.